.
لا تملك من الدنيا شيئًا سوى وجعها، وذاكرة تعج بالدمار، ونداء صغير من طفلتها العالقة خلف الحصار: "كيف حالك يا ماما؟" تقول هناء وهي تحبس دموعها: "طلعت قبل الحرب على رام الله لعلاج ابني من السرطان سنة 2023، وبعدها اندلعت الحرب… صرنا عالقين، مش قادرين نرجع، وأنا هون، وقلبي في غزة. "لكن المأساة لم تقف عند حد العجز والانتظار.
ففي الغارة التي استهدفت منزل عائلتها في الزوايدة، قُتلَت والدتها، واستشهدت ابنتاها لمى ويسرى، وأبناء إخوتها، وعدد كبير من أقربائها.
بناتي راحوا… زوجي راح… أمي كمان… ما ضل غير غيداء، بنتي الصغيرة… وهي كمان اليوم بين الحياة والموت. "غيداء، الطفلة التي لم تتجاوز أعوامها القليلة، نجت من الغارة لكن بجراح بالغة: كسر في العمود الفقري، نزيف داخلي في البطن، تهتك بالكبد، وكسور في الفخذ والساق.
وهي الآن في أحد مستشفيات قطاع غزة، محاصرة كغيرها، بلا دواء، بلا علاج، بلا أمل. "أنا ما بدي شيء، بس بدي بنتي تتعالج. ما بدي أخسرها كمان. هي آخر حدا ضل إلي. هناك ما فيش علاج، ما فيش أدوية، وما فيش أكل حتى. هي لوحدها جوّا، وأنا أمها برّا… مش قادرة أعمل شيء".
وفي مناشدة لا تخلو من ألم، تضيف هناء: "أنا بناشد أي حدا عنده ضمير حي، أي إنسان… يطلع بنتي من غزة. أنا مش طالبة إشي غير إنها تتعالج. حالتها خطيرة، وبدها رعاية، بدها أكل، بدها فرصة تعيش".
غيداء اليوم ليست حالة فردية، بل واحدة من آلاف القصص التي تنتظر من ينتشلها من ظلمة الحرب والحصار. آلاف الأمهات في غزة يدفنّ أحلامهن تحت الأنقاض، لكن هناء، كما كثيرات، لا تزال تتشبث بخيط أمل، أن تعود ابنتها إلى حضنها، قبل أن يتبدد الصوت الأخير في صمت العالم.
/انتهى/