به گزارش دفتر منطقهای خبرگزاری تسنیم، هیئت بلندپایه از جمهوری تاجیکستان، متشکل از مقامات وزارت خارجه، نهادهای امنیتی و سایر مسئولان ارشد دولتی، وارد کابل شده است. هدف این سفر، رایزنی و گفتگو درباره گسترش همکاریهای سیاسی، اقتصادی و امنیتی میان تاجیکستان و حکومت طالبان اعلام شده است.
به گزارش طلوعنیوز، انتظار میرود هیئت تاجیکستانی در جریان سفر خود به کابل، موضوع سفارت حکومت طالبان در دوشنبه، پایتخت تاجیکستان، را نیز بررسی و تبادل نظر کند.
پیشتر، هیئتی به ریاست «محمدیوسف وفا»، والی بلخ، به دعوت رسمی دولت تاجیکستان به دوشنبه سفر کرده بود و با مقامات ارشد این کشور، از جمله ژنرال «مومن ستاراویچ یتیموف» وزیر اطلاعات تاجیکستان، تبادل نظر کرده بود.
وزیر اطلاعات تاجیکستان در این دیدار تأکید کرد کشورش به هیچ گروهی که قصد بیثبات کردن افغانستان را دارد، پناه نخواهد داد و هیچ فعالیت مغرضانهای از خاک تاجیکستان علیه افغانستان انجام نخواهد شد.
طالبان نیز بر گسترش همکاریهای دوجانبه بر اساس منافع ملی تأکید کرد و افزود: «ناامنی در افغانستان به سود هیچ کشوری نیست و اجازه نخواهیم داد از خاک کشور علیه دیگران استفاده شود.»
از زمان به قدرت رسیدن طالبان در آگوست 2021، تاجیکستان تنها کشور آسیای مرکزی بود که روابط دیپلماتیک رسمی با حکومت کابل برقرار نکرد و تا سال 2024 میزبان مخالفان طالبان باقی ماند.
این سیاست منعکسکننده نگرانیهای امنیتی و سیاسی دوشنبه بود. با این حال، در اوایل 2025، تاجیکستان سیاست خود را تغییر داد و طالبان را به عنوان «قدرت حاکم واقعیت» پذیرفت. این تغییر با بازگشایی پنج بازار مرزی و اصلاحات در سیاست خارجی همراه شد و نشاندهنده پذیرش واقعیتهای سیاسی و اقتصادی منطقه بود.
به نظر میرسد که تاجیکستان ناچار به تعامل با افغانستان شده و در تلاش است موازنه جدیدی در روابط با کابل برقرار کند. بازگشایی بازارها، ارسال کمکهای بشردوستانه و پیامهای حسن نیت، نشاندهنده آمادگی تاجیکستان برای همکاری عملی با طالبان و حتی گشایش سفارت هیئت حاکمه افغانستان در شهر دوشنبه، در جهت تأمین ثبات و توسعه منطقه است.
انتهای پیام/.