آئی جی سندھ پولیس کی جانب سے بارہ ربیع الاول کانٹی جینسی پلان مرتب کرنے کی ہدایات

خبر کا کوڈ: 1257694 خدمت: پاکستان
اے ڈی خواجہ

آئی جی سندھ پولیس نے ہدایات جاری کی ہیں کہ صوبے میں امن وامان کی صورتحال اور اس ضمن میں درپیش چیلنجز کو سامنے رکھتے ہوئے رینج, ڈسٹرکٹس اور زونز کی سطح پر باہم مشاورت اور پاکستان رینجرز سندھ سمیت قانون نافذ کرنیوالے دیگر اداروں و انٹیلی جینس ایجنسیوں سے مربوط روابط پر مشتمل بارہ ربیع الاول کانٹی جینسی پلان جلد از جلد مرتب کیا جائے۔

خبر رساں ادارے تسنیم کے مطابق، آئی جی سندھ پولیس اے ڈی خواجہ نے ہدایات جاری کی ہیں کہ صوبے میں امن وامان کی صورتحال اور اس ضمن میں درپیش چیلنجز کو سامنے رکھتے ہوئے رینج, ڈسٹرکٹس اور زونز کی سطح پر باہم مشاورت اور پاکستان رینجرز سندھ سمیت قانون نافذ کرنیوالے دیگر اداروں وانٹیلی جینس ایجنسیوں سے مربوط روابط پر مشتمل بارہ ربیع الاول کانٹی جینسی پلان جلد مرتب کیا جائے تاکہ صوبے میں سیکیورٹی صورتحال کو مزید مستحکم بناتے ہوئے عوام کی جان ومال کے تحفظ کو یقینی بنایا جاسکے۔

ان کا کہنا تھا کہ کانٹی جینسی پلان کے تحت ضلعوں کی سطح پر تمام اسٹیک ہںولڈرز کے تعاون سے بین المسالک ہم آہنگی کے فروغ کے اقدامات سمیت دل آزار وال چاکنگ, مذہبی, مسلکی منافرت, اشتعال انگیز پمفلٹس, بینرز, ہینڈ آؤٹس یا دیگر مواد کی تقسیم, اشتعال انگیز تقاریر کی روک تھام کے علاوہ لاؤڈ اسپیکرز ایکٹ پر عمل درآمد کو بھی یقینی بنایا جائے۔

انہوں نے کہا کہ 12ربیع الاول کے مرکزی جلوس کے روٹس, مرکزی اجتماع گاہ پر سیکیورٹی کے خصوصی اقدامات کے تحت بم ڈسپوزل اسکواڈ سے سوئپنگ, کلیئرنس, واچ ٹاورز کے قیام, منتخب کردہ بلند عمارتوں پر شارپ شوٹرز کی تعیناتیوں, ہر قسم کی پارکنگ کو مناسب فاصلوں پر رکھنے, پارکنگ لاٹس پر نگرانی رکھنے, انر آؤٹر کارڈن, ہیڈ اینڈ ٹیل پر پولیس کمانڈوز کو فرائض تفویض کرنے, ایڈوانس انٹیلی جینس کلیکشن و شیئرنگ کو مذید تقویت دینے, رینڈم اسنیپ چیکنگ, پیٹرولنگ, پکٹنگ وغیرہ کے امور کو ہر سطح پر انتہائی ٹھوس اور غیرمعمولی بنایا جائے۔

انہوں نے مزید کہا کہ تمام مساجد, امام بارگاہوں, مدارس, مزارات, درگاہوں وغیرہ پر سیکیورٹی مذید سخت کرنے کے ساتھ ساتھ دیگر ایسے کھلے مقامات کہ جن پر اس خصوصی دن کی مناسبت سے نعتیہ محافل, وعظ, تقاریر, درس, بیان وغیرہ کا اہتمام کیا جارہا ہو تھانہ جات کے لحاظ سے جملہ سیکیورٹی اقدامات کو فول پروف بنایا جائے۔

آئی جی سندھ نے کہا کہ 12ربیع الاول حفاظتی منصوبے کے تحت مختلف علاقوں کو انتہائی حساس, حساس اور نارمل درجہ بندیوں میں تقسیم کیا جائے جبکہ مرکزی جلوسوں کی گذرگاہوں کے باقاعدہ فاصلوں کو پیش نظر رکھ کر سیکٹرز اور سب سیکٹرز میں تقسیم کیا جائے تاکہ بائی نیم سپروائزری ذمہ داریاں تفویض کرتے ہوئے سیکیورٹی کے مجموعی امور کو ٹھوس اور مربوط بنایا جاسکے۔

انہوں نے کہا کہ 12ربیع الاول سیکیورٹی پلان کے تحت پولیس ریزرو پلاٹونز, اینٹی رائٹس پلاٹونز کو بھی تیار اور الرٹ حالت میں رکھا جائے جبکہ ضلعوں کی سطح پر تمام پولیس کنٹرول رومز اور مرکزی کنٹرول روم کے مابین مضبوط روابط کے ساتھ ساتھ اطلاعات/ احکامات/ ہدایات کی بروقت شیئرنگ اور تعمیلی رپورٹس کے لئے وائرلیس اسٹاف کو پابند بنایا جائے۔

انہوں نے کہا کہ سینٹرل پولیس آفس میں قائم مرکزی کمانڈ اینڈ کنٹرول سینٹر سے مانیٹرنگ, نگرانی اور بعدازاں ضروری ہدایات پر عمل درآمد جیسے اقدامات کو 12ربیع الاول سیکیورٹی اقدامات کا حصہ بنایا جائے۔

آئی جی سندھ نے ٹریفک پولیس کو ہدایات جاری کیں کہ ٹریفک کی روانی کو برقرار رکھنے اور شہریوں کو پریشانی سے بچانے کے لئے 12ربیع الاول کی مناسبت سے خصوصی ٹریفک پلان ترتیب دیکر اسے نافذالعمل بنایا جائے اور اس حوالے سے تمام تر متبادل روٹس سے شہریوں کو آگاہ رکھنے اور ٹریفک پولیس کی ڈپلائمنٹ کے لئے بھی تمام ضروری امور کو یقینی بنایا جائے۔

    تازہ ترین خبریں