افغان سرحد پر موجود دہشت گرد خطے کیلئے خطرہ، پینٹاگون

خبر کا کوڈ: 1271976 خدمت: پاکستان
پنتاگون

امریکی محکمہ دفاع ’پینٹاگون‘ کا کہنا ہے کہ پاک-افغان سرحد پر موجود دہشت گرد گروپ دونوں ممالک کے لیے سیکیورٹی چیلنج اور خطے کے امن و استحکام کے لیے خطرہ ہیں۔

خبر رساں ادارے تسنیم نے ڈان نیوز سے نقل کیا ہے کہ رواں ہفتے "افغانستان میں سیکیورٹی اور استحکام میں اضافہ" (Enhancing security and stability in Afghanistan) کے نام سے جاری رپورٹ میں پینٹاگون نے دہشت گردی کے خاتمے کے لیے پاکستان اور افغانستان کے درمیان فوجی تعاون بڑھانے کی ضرورت پر بھی زور دیا۔

رپورٹ میں دعویٰ کیا گیا کہ پاکستان اور افغانستان کے سرحدی علاقوں میں اب بھی متعدد دہشت گرد گروپوں کے ٹھکانے موجود ہیں۔

ان دہشت گرد گروپوں میں طالبان، القاعدہ، القاعدہ برصغیر، حقانی نیٹ ورک، لشکر طیبہ، کالعدم تحریک طالبان پاکستان، داعش ۔ خراسان، اور اسلامک موومنٹ آف ازبکستان شامل ہیں۔

رپورٹ میں کہا گیا ہے کہ "القاعدہ برصغیر" جنوبی اور وسطی ایشیا سے بڑے پیمانے پر جنگجو بھرتی کر رہی ہے، جس سے خطے میں امریکی مفادات کو براہ راست خطرہ لاحق ہے۔

رپورٹ میں مزید کہا گیا کہ امریکا، پاکستان کی جانب سے سیکیورٹی ماحول میں بہتری کے لیے اٹھائے جانے والے اقدامات کو سراہتا ہے لیکن ساتھ ہی دہشت گردوں اور شدت پسندوں کی محفوظ پناہ گاہوں کا مکمل خاتمہ چاہتا ہے۔

    تازہ ترین خبریں