کنٹرول لائن پر عسکریت پسندوں کی موجودگی، بھارت کا آزاد کشمیر میں بدامنی پھیلانے کا ایجنڈا ہے
پاکستان آرمی چیف نے کہا ہے کہ بھارت کے کنٹرول لائن کے ساتھ عسکریت پسندوں کی موجودگی کے پروپیگنڈا کامقصد آزاد کشمیر میں بد امنی پھیلانا ہے اور دہلی کا یہ ایجنڈا کبھی کامیاب نہیں ہوگا۔
خبررساں ادارے تسنیم کے مطابق آرمی چیف جنرل قمر جاوید باجوہ نے کہا ہے کہ بھارت کے عسکریت پسندوں کی لائن آف کنٹرول کے ساتھ موجودگی کے پروپیگنڈے کا مقصد آزاد جموں و کشمیر میں بد امنی پھیلانا ہے، اس کا یہ ایجنڈا کبھی کامیاب نہیں ہوگا، آزاد جموں و کشمیر کے لوگ بھارتی ایجنڈے اور مقبوضہ کشمیر میں ہونے والے بھارتی مظالم سے مکمل واقف ہیں، پاک فوج لائن آف کنٹرول کے قریب رہنے والے لوگوں کی حفاظت یقینی بنانے کا سلسلہ جار ی رکھے گی۔
پاک فوج کے شعبہ تعلقات عامہ ( آئی ایس پی آر ) کے مطابق آرمی چیف جنرل قمر جاوید باجوہ نے لائن آف کنٹرول پر کیل سیکٹر اور شاردہ میں اگلے مورچوں کا دورہ کیا جہاں پر جنرل کمانڈنگ آفیسر مری میجرجنرل اظہر عباس نے انہیں لائن آف کنٹرول پر حالیہ مہینوں میں ہونے والی سیز فائر کی خلاف ورزیوں پر بریفنگ دی۔
اس موقع پر آرمی چیف کو ملک میں جاری مردم و خانہ شماری میں پاک فوج کے تعاون و حمایت کے حوالے سے بھی آگاہ کیاگیا۔
آرمی چیف نے فوج کی آپریشنل تیاریوں پر اطمینان کا اظہار کیا اور کہا کہ پاک فوج لائن آف کنٹرول کے قریب رہنے والے لوگوں کی مکمل طور پرحفاظت یقینی بنا نے کا سلسلہ جاری رکھے گی۔
انہوں نے آزاد جموں و کشمیرحکومت کے تعاون کے ساتھ علاقے میں ترقیاتی کام جاری رکھنے اور ان میں پیش رفت یقینی بنانے کی ہدایت بھی کی۔
قبل ازیں آرمی چیف کی آمد پرکور کمانڈر راولپنڈی لیفٹیننٹ جنرل ندیم رضا نے ان کا استقبال کیا۔
