نواز حکومت نے راحیل شریف کو امریکیوں اور عربوں کی خوشنودی کی خاطر تعینات کیا ہے + ویڈیو

خبر کا کوڈ: 1402154 خدمت: ایران
امام مہدی کانفرنس

مجلس وحدت مسلمین پاکستان کے مرکزی سیکرٹری کا کہنا ہے کہ امریکا و عرب ریاستوں کی خوشنودی کے لئے نواز شریف نے راحیل شریف کو فرقہ واریت پر مبنی فوجی اتحاد میں شامل ہونے کے لئے بھیج دیا۔

خبر رساں ادارے تسنیم کے مطابق مجلس وحدت مسلمین پاکستان کے مرکزی سیکرٹری علامہ راجہ ناصر عباس جعفری نے پریس کانفرنس سے خطاب کرتے ہوئے کہا ہے کہ پاکستان کی سالمیت و بقا ہمیں اپنی جان سے بھی زیادہ عزیز ہے۔ جو قوتیں پاکستان کو کمزور کرنا چاہتی ہیں انہیں بہت جلد اپنے انجام سے دوچار ہو نا پڑے گا۔ وطن عزیزکو کرپشن اور بدحالی سے نجات دلانے کے لیے مختلف سیاسی و مذہبی قوتوں کے ساتھ مل کر بھرپور جدوجہد کی جائے گی۔ بد دیانت حکمرانوں نے وطن عزیز کو بے دردی سے لوٹا ہے۔ جب تک ان خیانت کاروں سے نجات حاصل نہیں ہوتی تب تک قوم اضطراب، بے یقینی اور معاشی بد حالی کا شکار رہے گی۔

انہوں نے تاکید کی کہ پاکستان میں امریکی اور عرب حکمرانوں کی مداخلت نے ہمارے امن و امان کو سخت نقصان پہنچایا ہے، نواز حکومت نے عوامی خواہش کے برعکس اور پارلیمنٹ کو اعتماد میں لئے بغیر صرف اور صرف امریکا و عرب بادشاہتوں کی خوشنودی حاصل کرنے کیلئے راحیل شریف کو متنازعہ ترین فرقہ وارانہ فوجی اتحاد میں شمولیت کیلئے بھیج دیا، جبکہ واضح ہے کہ فوجی اتحاد میں شمولیت اور راحیل شریف کو این او سی دینے کے اس فیصلے پر پاکستانی قوم اور پارلیمنٹ کو شدید تحفظات تھے، اور وہ بھی ایک ایسے حساس ترین وقت میں جب وطن عزیز پاکستان دہشتگردی کی آگ میں جل رہا ہے، ملک و قوم پہلے ہی آمر ضیاء کی بدترین پالیسیوں کا خمیازہ بھگت رہے ہیں، ماضی کی فاش غلطیوں سے سبق سیکھنے کی بجائے امریکا نواز حکمران مزید ایسی غلطیوں کے مرتکب ہورہے ہیں، جس سے وطن عزیز دہشتگردی و عدم استحکام کی ایسی دلدل میں پھنس جائے گا جس سے نکلنا شاید ممکن نہ ہو سکے، نواز حکومت دہشتگردی کے خلاف جنگ میں مصروف پاک افواج کو ایک بار پھر امریکی ایماء پر تیزی سے زوال پزیر عرب بادشاہتوں کی بقاء کی ناکام جنگ میں دھکیلنا چاہتی ہے، امید ہے کہ ہماری پاک افواج کرپٹ نواز حکومت کے ان ناپاک عزائم کا شکار نہیں ہونگے اور اپنی تمام تر توجہ پاکستان کو دہشتگردی کے بحران سے نکالنے پر اپنی توجہ مرکوز رکھیں گے، دہشتگردوں کے علمی ،نظریاتی اور صحافتی سہولت کاروں کو بھی آپریشن ردا لفساد کے تحت قانون کے شکنجے میں جکڑیں گے۔

انہوں نے مزید کہا کہ آج ملک بھر میں سینکڑوں کی تعداد میں بے گناہ محب وطن شیعہ علمائے کرام و شخصیات کو امریکا اور اسکی غلام عرب بادشاہتوں کی ایماء اورمداخلت کے باعث ماورائے عدالت اغواء کیا جا چکا ہے، اگر جلد بازیابی عمل میں نہیں لائی گئی توپانچ کروڑ شیعہ مسلمان سڑکوں پر نکل کر ظلم جابر حکمرنوں کا اقتداربہا لے جائیں گے، محب وطن ملت تشیع تمام تر ظلم و ستم سہنے اور ہزاروں قیمتی ترین شہداء دینے کے باوجود پاکستان کو امریکا اور اسکی ہمنوا عرب بادشاہتوں کے چنگل سے نکالنے تک اپنی جدوجہد جاری رکھے گی، ماضی کی طرح آج بھی امریکا، اسرائیل، بھارت اور عرب بادشاہتوں کی ناپاک سازشوں کو ناکام بناتے رہیں گے، آل سعود اپنے اقتدار کو بچانے کے لیے یہود و نصاری سے مدد مانگ رہے ہیں۔ اسرائیل اور امریکہ مسلمانوں کے ازلی دشمن ہیں۔ ان کی طرف دوستی کا ہاتھ بڑھانا عالم اسلام کے مفادات کو نقصان پہنچانے کے مترادف ہے۔ اس وقت امت مسلمہ اور وطن عزیز دونوں ہی استعماری طاقتوں کے نشانے پر ہیں۔دین اسلام کی بنیادی تعلیمات کو انتہا پسند قوتوں اور کالعدم مذہبی جماعتوں کے ذریعے مسخ کر کے پیش کیا جا رہا ہے تاکہ اسلام کے روشن چہرے کو بدنما ظاہر کیا جا سکے۔ اسلام دشمن قوتیں امت مسلمہ کو اسلام کی بنیادی تعلیمات سے منحرف کرنے کے لیے عقیدے پر ضرب لگانا چاہتی ہیں۔ امام مہدی علیہ السلام کی ذات مقدسہ پرمسلمانون کے تمام مسالک کا اجماع اور مکمل ایمان ہے۔ قرب قیامت کی علامات میں امام مہدی علیہ السلام کا ظہور مستند کتابوں میں مذکور ہے۔ امام برحق کے خلاف بات کرنا احادیث نبوی صلی اللہ علیہ و آلہ وسلم کو صریحاََ جھٹلانے کے مترادف ہے جو توہین رسالت ہے۔ سعودی وزیر دفاع محمد بن سلیمان نے امام مہدی علیہ السلام سے جنگ کرنے کا ارادہ ظاہر کر کے گناہ کبیرہ کا ارتکاب کیاہے۔انہوں نے 21مئی کو نشتر پارک کراچی میں استحکام پاکستان وامام مہدی علیہ السلام کانفرنس کے انعقاد کا بھی اعلان کیا۔

انہوں نے کہا کہ یہ کانفرنس مختلف مذہبی جماعتوں کاعظیم الشان اجتماع ہو گا اور پاکستان کے استحکام کے لیے مشترکہ لائحہ عمل کا اعلان کیا جائے گا۔انہوں نے افغانستان کی جانب سے چمن بارڈ پر حملہ سمیت مردان یو نیورسٹی میں مشعل خان کے قتل کی شدید مذمت کی۔

علامہ راجہ ناصر عباس جعفری نے صحافیوں کے اعزاز میں دیئے جانے والے عصرانے میں ان کی آمد پر شکریہ ادا کیا۔

کانفرنس ایم ڈبلیو ایم کے رہنماعلامہ احمد اقبال رضو ی، علامہ مرزا یوسف حسین، علامہ اظہرنقوی، علامہ علی انور جعفری، علی حسین نقوی، علامہ مبشر حسن، آصفوی صفوی سمیت دیگر موجود تھے۔

    تازہ ترین خبریں