چین نے پاکستان میں فوجی اڈے کے قیام سے متعلق امریکی دعوے کو من گھڑت قرار دیا

خبر کا کوڈ: 1449363 خدمت: دنیا
سخنگوی وزارت دفاع چین

چینی وزارت دفاع نے پاکستان میں فوجی اڈے کے قیام سے متعلق پینٹاگون کی رپورٹ کو مسترد کردیا اور کہا ہے کہ میڈیا پر نشر ہونے والی اس قسم کی تمام خبریں بے بنیاد ہیں۔

خبر رساں ایجنسی تسنیم کے مطابق رواں ماہ کے آغاز میں امریکی محکمہ دفاع پینٹا گون نے ایک رپورٹ جاری کی تھی جس میں اس بات کا اشارہ دیا گیا تھا کہ چین ممکنہ طور پر مستقبل میں پاکستان کے اندر اپنا فوجی اڈہ قائم کرسکتا ہے۔

پینٹاگون کی رپورٹ میں یہ بھی کہا گیا تھا کہ افریقی ملک جبوتی میں فوجی اڈے کے قیام کے بعد چین دیگر ممالک میں بھی اپنے اڈے قائم کرنے کی منصوبہ بندی کررہا ہے۔

چینی وزارت دفاع کے ترجمان کرنل وو چیان سے جب نیوز بریفنگ کے دوران یہ پوچھا گیا کہ کیا چین پاکستان کے پورٹ سٹی گوادر میں بحری اڈہ بنانے کی منصوبہ بندی کررہا ہے تو انہوں نے کہا کہ یہ باتیں محض قیاس آرائیوں پر مبنی ہیں جب کہ انہوں نے اس سلسلے میں مزید کچھ کہنے سے گریز کیا۔

یاد رہے کہ جب چین نے جبوتی میں اپنا فوجی اڈہ قائم کیا تھا تو بھارت نے اس پر تشویش کا اظہار کیا تھا تاہم چین ہمیشہ اس بات کی تردید کرتا آیا ہے کہ وہ دنیا بھر میں اپنے فوجی اڈے قائم کرنے کا خواہاں ہے البتہ حالیہ برسوں میں چین اپنی فوج کو جدید خطوط پر استوار کرنے کے لیے بڑے پیمانے پر رقم خرچ کررہا ہے۔

    تازہ ترین خبریں