پاک بحریہ کا فضا سے سمندر میں مار کرنے والے میزائل کا کامیاب تجربہ

خبر کا کوڈ: 1527446 خدمت: پاکستان
پاک بحریہ

پاک بحریہ نے شمالی بحیرہ عرب میں فضاء سے سطح آب پر مار کرنے والے جہاز شکن میزائل کا کامیاب تجربہ کیا۔

خبر رساں ادارے تسنیم کے مطابق ترجمان پاک بحریہ کی جانب سے جاری کیے گئے بیان کے مطابق شمالی بحیرہ عرب میں سی کنگ ہیلی کاپٹر سے اینٹی شپ میزائل فائر کیا گیا، جس نے سمندر میں کامیابی سے اپنے ہدف کو نشانہ بنایا۔

ترجمان کے مطابق چیف آف دی نیول اسٹاف ایڈمرل ذکاء اللہ نے میزائل تجربے کا مظاہرہ دیکھا۔

اس موقع پر نیول چیف کا کہنا تھا کہ کامیاب تجربہ جنگی تیاری اور پیشہ ورانہ صلاحیتوں کا واضح ثبوت ہے۔

انہوں نے افسروں اور جوانوں کی پیشہ ورانہ صلاحیتوں کو سراہتے ہوئے کہا کہ پاکستان نیوی فلیٹ کی جنگی تیاریوں پر فخر ہے۔

نیول چیف ایڈمرل ذکاء اللہ کا کہنا تھا کہ پاک نیوی وطن عزیز کی بحری سرحدوں اور مفادات کا ہر قیمت پر تحفظ کرے گی۔

پاک بحریہ مسلسل اپنی دفاعی صلاحیتوں میں اضافے میں مصروف عمل ہے۔

رواں برس مارچ میں پاک بحریہ نے زمین سے سطح آب پر مار کرنے والے میزائل کا کامیاب تجربہ کیا تھا، جدید ٹیکنالوجی اور ایویونکس سے لیس اس میزائل نے سمندر میں اپنے ہدف کو کامیابی سے نشانہ بنایا تھا۔

اس سے قبل اپریل 2016 میں بھی پاک بحریہ نے زمین سے سمندر میں ہدف کو نشانہ بنانے والے ’ضرب‘ میزائل کا کامیاب تجربہ کیا تھا۔

نومبر 2015 میں پاکستان نیوی کی جانب سے شمالی بحیرہ عرب میں جنگی بیڑے سے اینٹی شپ میزائلوں کے کامیاب تجربات بھی کیے جاچکے ہیں۔

واضح رہے کہ حالیہ مہینوں میں پاکستان جوہری ہتھیار اپنے ہدف تک لے جانے کی صلاحیت رکھنے والے کئی بیلسٹک میزائلوں کے تجربات بھی کر چکا ہے۔

    تازہ ترین خبریں
    خبرنگار افتخاری