ممبئی کے ریلوے اسٹیشن پر بھگدڑ سے 22 افراد ہلاک، 30 زخمی


ممبئی کے ریلوے اسٹیشن پر بھگدڑ سے 22 افراد ہلاک، 30 زخمی

بھارتی شہر ممبئی کے ریلوے اسٹیشن پر بھگڈر مچنے سے 22 افراد ہلاک اور 30 زخمی ہوگئے۔

خبر رساں ادارے تسنیم کے مطابق ممبئی میں ایلفنسٹن ریلوے اسٹیشن پر بھگڈر مچنے سے کم از کم 22 افراد ہلاک اور 30 زخمی ہوگئے۔ لاشوں اور زخمیوں کو طبی امداد فراہم کرنے کے لیے اسپتال منتقل کردیا گیا ہے۔ بعض افراد شدید زخمی ہیں جس کی وجہ سے ہلاکتوں میں اضافے کا اندیشہ ہے۔

بھارتی حکام کے مطابق کام کے اوقات میں ایلفنسٹن ریلوے اسٹیشن پر دفتر جانے والے لوگوں کا شدید رش ہوتا ہے اور بھگڈر مچنے کا واقعہ پیدل چلنے والوں کے پل پر پیش آیا جو دو اسٹیشنوں کو ملاتا ہے۔

پولیس نے بتایا کہ 4 ٹرینیں ایک ساتھ آئیں جب کہ بارش بھی ہورہی تھی۔ بہت سارے لوگ ٹرینوں میں بیٹھنے کے لیے دوڑے جس کی وجہ سے بعض خواتین پھسل گئیں اور بھگڈر مچ گئی جبکہ متعدد لوگ پیروں کے نیچے آکر کچلے گئے ۔

اس دوران ریلوے اسٹیشن اور پل پر اتنا ہجوم جمع ہوگیا کہ بعض افراد نے پل سے چھلانگیں لگادیں جس کے نتیجے میں کئی افراد کی ٹانگیں بھی ٹوٹ گئیں اور شدید چوٹیں آئیں۔

سوشل میڈیا پر بھارتی شہریوں نے واقعے پر شدید غم و غصے کا مظاہرہ کرتے ہوئے عوام کو بنیادی سہولیات کی فراہمی میں ناکامی پر مودی حکومت کو کڑی تنقید کا نشانہ بناتے ہوئے کہا کہ ہمارے ٹیکسز کا یہ اچھا صلہ مل رہا ہے۔

بھارتی میڈیا نے بتایا کہ پیدل چلنے والوں کا پل بھی انتہائی خستہ حال اور گنجائش سے چھوٹا ہے جسے ٹھیک کرانے کے لیے بارہا مطالبات کیے گئے لیکن حکومت کے کانوں پر جوں نہیں رینگی

اہم ترین دنیا خبریں
اہم ترین خبریں
خبرنگار افتخاری