لاہور؛ ٹی ٹوئنٹی میچ کیلئے 1500 روپے والے تمام ٹکٹ فروخت

خبر رساں ادارے تسنیم کے مطابق پاکستان اور سری لنکا کے درمیان ٹی ٹوئنٹی سیریز کا تیسرا میچ قذافی اسٹیڈیم میں 29 اکتوبر کو کھیلا جائے گا اور سری لنکن کرکٹ بورڈ نے بھی اپنی ٹیم کو پاکستان بھیجنے کی منظوری بھی دیدی ہے۔

ڈان نیوز کے مطابق کرکٹ شائقین کو پاکستان اور سری لنکا کے درمیان تیسرے ٹی ٹوئنٹی کا بے چینی سے انتظار ہے اور میچ دیکھنے کے لئے ٹکٹ حاصل کرنے کی سر توڑ کوششیں بھی کر رہے ہیں۔

میچ کے لیے ٹکٹوں کے حصول کے پہلے مرحلے میں 7 انکلوژر کے ٹکٹ آن لائن فروخت کے لیے دستیاب تھے اور سات میں سے چار عبدالقادر، اے ایچ کاردار، جاوید میانداد اور راجاز انکلوژرز کے ٹکٹوں کی قیمت 1500 روپے مقرر کی گئی تھی اور ان انکلوژر کے تمام ٹکٹ فروخت ہو چکے ہیں۔

عمران خان اور فضل محمود انکلوژر کے ٹکٹ کی قیمت 3 ہزار روپے جبکہ وسیم اکرم انکلوژر کے لیے ٹکٹ کی قیمت 5 ہزار روپے مقرر کی گئی ہے اور 1500 روہے والے ٹکٹ فروخت ہونے کے بعد دیگر ٹکٹوں کی مانگ بڑھ چکی ہے۔

خیال رہے کہ 2009 میں سری لنکا کی ٹیم پر لاہور میں حملے کے بعد سے پاکستان میں انٹرنیشنل کرکٹ معطل ہو گئی تھی اور اس حملے کے بعد زمبابوے کے بعد سری لنکا ٹیسٹ کھیلنے والی دوسری ٹیم ہے جو پاکستان کا دورہ کرے گی۔