خطبہ حجۃ الوداع ہر سرکاری دفتر میں آویزاں کیا جائے، علامہ ریاض شاہ

خبر کا کوڈ: 1555727 خدمت: پاکستان
علامہ ریاض شاہ

جے اے پی کے مرکزی ناظم اعلیٰ کا اس بیان کیساتھ کہ امریکہ، بھارت اور اسرائیل اسلام اور پاکستان کیخلاف سازشوں میں مصروف ہیں،کہنا تھا کہ ختم نبوت حلف نامہ کی تبدیلی کی سازش میں اندرونی و بیرونی قوتیں ملوث ہیں۔

خبر رساں ادارے تسنیم کے مطابق جماعت اہلسنت پاکستان کے مرکزی ناظم اعلی علامہ ریاض حسین شاہ نے لاہور کے ادارہ تعلیمات اسلامیہ میں ہفتہ وار فکری اجتماع "صدائے محراب" سے خطاب کرتے ہوئے کہا کہ ختم نبوت حلف نامہ تبدیل کرنے والوں کو سزا ملنے تک قوم مطمئن نہیں ہو گی، راجہ ظفرالحق کی تحقیقاتی کمیٹی کی رپورٹ سامنے لائی جائے، پاکستان کو اسلامی فلاحی ریاست بنایا جائے۔

انہوں نے کہا کہ پاکستان میں منظم سازش کے تحت فکری آلودگی پھیلائی جا رہی ہے، عالمی قوتیں قانون ناموس رسالت کو غیر موثر بنانے کی سازشوں میں مصروف ہیں، قرار داد مقاصد پر عمل ہی تمام مسائل کا حل ہے، ممبران پارلیمنٹ اسمبلیوں میں نظام مصطفے(ص) کیلئے آواز اٹھائیں۔

علامہ ریاض حسین شاہ نے مزید کہا کہ خطبہ حجۃ الوداع ہر سرکاری دفتر میں آویزاں کیا جائے، علماء اسلام کے پیغام امن و محبت کو پھیلائیں۔

انہوں نے کہا کہ امریکہ، بھارت اور اسرائیل اسلام اور پاکستان کیخلاف سازشوں میں مصروف ہیں، غلبہ اسلام کیلئے صوفیاء کے طرز عمل کو اپنانے کی ضرورت ہے، ختم نبوت حلف نامہ کی تبدیلی کی سازش میں اندرونی و بیرونی قوتیں ملوث تھیں۔

    تازہ ترین خبریں
    خبرنگار افتخاری