ہم نے امام حسین ؑکے رستے کو چنا ہے جس پر آخری دم تک قائم رہیں گے

خبر رساں ادارے تسنیم کے مطابق مجلس وحدت مسلمین پاکستان کے مرکزی ڈپٹی سیکرٹری جنرل اور آئی ایس او پاکستان کے سابق مرکزی صدر سید ناصرعباس شیرازی نے ایک ماہ کی جبری گمشدگی کے بعد گھر واپس پہنچنے پرسربراہ مجلس وحدت مسلمین علامہ راجہ ناصرعباس جعفری سے ملاقات کی ہے۔

اس موقع پر انہوں نے اپنے ویڈیو پیغام میں کہا ہے کہ خداوند کریم کے خاص لطف کی بدولت میں خیریت سے واپس آ گیا ہوں اور ان تمام خواتین ماؤں، بہنوں اور احباب کا شکر گذار ہوں جنہوں نے کربلا معلیٰ سے لیکر پوری دنیا میں انہیں دعاؤں میں یاد رکھا، یا اپنی عملی کوششوں کے ذریعے میری رہائی کیلئے مصروف رہے۔

ان کا کہنا تھا کہ پاکستان کی تمام مذہبی و سیاسی جماعتوں کے قائدین کا شکر گذار ہوں، جنہوں نے پاکستان کے آئین و قانون کی سربلندی کیلئے آواز اٹھائی، کڑے وقت میں اسٹینڈ لیا اور کردار ادا کیا۔

انہوں نے کہا کہ اگر ہم نے امام حسین علیہ السلام کے رستے کو چنا ہے تو ان مشکلات کیساتھ چنا ہے اور ہم زندگی کے آخری لمحے تک اس عہد پر قائم رہینگے۔