حضرت علی علیہ السلام کی ولادت با سعادت کی مناسبت سے دنیا بھر میں جشن و سرور


حضرت علی علیہ السلام کی ولادت با سعادت کی مناسبت سے دنیا بھر میں جشن و سرور

مولائےکائنات امیرالمومنین حضرت علی بن ابیطالب علیہ السلام کی ولادت باسعادت کے موقع پر اسلامی جمہوریہ ایران میں سرکاری اور نجی عمارتوں اور سڑکوں کو انتہائی خوبصورتی کے ساتھ سجایا گیا ہے۔

تسنیم خبررساں ادارے کی رپورٹ کے مطابق، مولائے متقیان امیرالمومنین حضرت علی بن ابیطالب علیہ السلام کی ولادت باسعادت کی مناسبت سے پاکستان اور ایران سمیت دنیا بھر میں جشن و سرور اور منقبت خوانی کا سلسلہ جاری ہے۔

دنیا بھر میں عاشقان حیدر کرار جگہ جگہ لوگوں میں شربت اور مٹھائیاں تقسیم کر رہے ہیں۔

 اسلامی جمہوریہ ایران میں جشن مولود کعبہ کے مرکزی اجتماعات حضرت امام علی رضا علیہ السلام کے حرم مطہر اور قم المقدسہ میں جناب فاطمہ معصومہ سلام اللہ علیھا کے حرم مطہر میں جاری ہیں جہاں بڑی تعداد میں عاشقان اہلبیت اطہار(ع) جشن علوی میں شریک ہیں۔

مولائے کائنات کی ولادت باسعادت کے موقع پر عراق کے مقدس شہروں نجف اشرف، کربلائے معلی، کاظمین اور سامرہ میں بھی وسیع پیمانے پر جشن کا اہتمام کیا گیا ہے۔ جبکہ نجف اشرف میں لاکھوں کی تعداد میں عراقی اور غیر ملکی زائرین حضرت امام علی علیہ السلام کا جشن ولادت بڑی ہی دھوم سے منا رہے ہیں اور ذاکرین و شعرائے کرام بارگاہ علوی میں اپنے اپنے مخصوص انداز میں خراج عقیدت پیش کر رہے ہیں۔

پاکستان اور ہندوستان میں بھی جگہ جگہ محافل میلاد کا اہتمام کیا گیا ہے اور گھر گھر نذر و نیاز کا سلسلہ جاری ہے۔

 حضرت علی علیہ السلام تیرہ رجب المرجب سنہ تیس عام الفیل کو خانہ کعبہ میں اس دنیا میں تشریف لائے- آپ کی مادر گرامی جناب فاطمہ بنت اسد اپنے شوہر حضرت ابوطالب کے گھر سے نکل کر جیسے ہی خانہ کعبہ کے پاس پہنچیں دیوار کعبہ شق ہو گئی۔ آپ خانہ کعبہ میں داخل ہو گئیں اور یوں حضرت علی علیہ السلام کی خانہ کعبہ میں ولادت ہوئی۔

بچپن سے ہی حضرت علی علیہ السلام کی آغوش رسالت میں پرورش ہوئی اور پھر تبلیغ دین میں آپ ہمیشہ سرکار دوعالم حضرت محمد مصطفی (ص) کے ساتھ ساتھ رہے۔

مولائے کائنات فضائل و مناقب کا سمندر ہیں اور خود سرکار دو عالم (ص) کا ارشاد ہے کہ علی کی معرفت میرے اور اللہ کے سوا کسی کو نہیں ہے۔ 

سب سے زیادہ دیکھی گئی ایران خبریں
اہم ترین ایران خبریں
اہم ترین خبریں
خبرنگار افتخاری