پاکستان؛ وزارت عظمیٰ کی مدت ختم ہونے کے ایک ہفتہ قبل ترقیاتی منصوبوں کیلئے خطیر رقم مختص

خبر رساں ادارے تسنیم کے مطابق وزیراعظم شاہد خاقان عباسی کی صدارت میں منعقدہ اجلاس میں پانی سے متعلق 2 منصوبوں کی ریوائز کاسٹ (اضافے اخراجات) کے لیے 523 ارب روپے مختص کیےگئے۔

اجلاس میں پی سی اون نیلم جہلم ہائیڈروالیکٹرک منصوبے کے لیے چوتھی مرتبہ 506 ارب روپے متخص ہوئے۔

واضح رہے کہ مذکورہ منصوبہ 2002 میں شروع کیا گیا تھا جس پر آنے والی لاگت 84 ارب 5 کروڑ روپے تھی تاہم منصوبہ مکمل نہیں ہو سکا اور اب چوتھی مرتبہ ریوائز کاسٹ منظور کرلی گئی۔

منصوبے کے ڈیزائن میں تبدیلی اور 2005 میں زلزلہ کے باعث 2012 میں 277 ارب 5 کروڑ روپے کی لاگت کا تخمینہ لگا یا گیا اور پھر 2015 میں دوبارہ 404 ارب روپے کی ریوائز کاسٹ منظور کی گئی۔

اس سے قبل رواں میں سینٹرل ڈیولپمنٹ ورکنگ پارٹی نے 500 ارب روپے منظور کرتے ہوئے تھرڈ پارٹی کو لاگت اور منصوبے کے لیے مختص کردہ 507 ارب روپے سے زیادہ اخراجات کا جائزہ لینے کے لیے حکم دیا تھا۔

وزیراعظم کی صدارت میں سندھ بیراج امپرومنٹ منصوبہ کے تحت فیز دوم کے لیے 16 ارب 66 کروڑ روپے کی منظوری دے دی۔

منصوبے میں سکھر بیراج کو جدید خطوط پر استوار کرنے کے علاوہ اس میں 0.9 ملین کیوسک پانی کی مقدار کو 1.3 ملین کیوسک تک بڑھانا شامل ہے۔

واضح رہے کہ منصوبے کے لیے 80 فیصد فنڈنگ ورلڈ بینک کی جانب سے کی جاری ہے جبکہ باقی 20 فیصد کی ادائیگی وفاق اور سندھ حکومت مل کر دیں گے۔

خیال رہے کہ سکھر بیراج کو 1932 میں تعمیر کیا گیا اور اس کی مجموعی عمر 85 برس کی ہو چکی ہے جبکہ اس حد ممکنہ طور پر 60 برس تھی۔

ای سی این ای سی نے پنجاب ، خیبر پختونخوا، سندھ اور بلوچستان میں شعبہ صحت سے متعلق منصوبوں کے لیے 131 ارب 78 کروڑ روپے منظور کیے۔

مذکورہ پروگرام کے تحت نیشنل میٹرنل، چائلڈ ہیلتھ پروگرام، نیشنل پرواگرم برائے فیملی پلاننگ اور پرائمری ہیلتھ کیئر، نیشنل دمہ کنٹرول، انسداد ہیپاٹائٹس پروگرام سمیت دیگر ادارے شامل ہیں۔

اس کے علاوہ ای سی این ای سی کے اجلاس میں مستونگ میں 220 کےکلو واٹ سب اسٹیشن اور سبی مستونگ کوئٹہ لورالائی کے لیے بھی 220 کلو وٹ کی ڈبل سرکٹ ٹرانسمیشن لائن کے لیے 14 ارب 15 کروڑ روپے کی منظوری دی گئی۔

علاوہ ازیں اسلام آباد میں پاکستان انسٹی ٹیوٹ آف ڈیولپمنٹ اکنامکس کے لیے 3 ارب 52 کروڑ روپے مختص کیے گئے تا کہ ادارے کے لیے اراضی خرید ی جا سکے۔ اس کے علاوہ اورسیز اسکالرشپ اسکیم کے لیے 200 ڈاکٹریٹ (پی ایچ ڈی) کے لیے 22 ارب 2 کروڑ روپے کی منظوری دی گئی۔