انتخابات 2018؛ امیدواروں کے کاغذات نامزدگی کی جانچ پڑتال کا آج آخری روز


انتخابات 2018؛ امیدواروں کے کاغذات نامزدگی کی جانچ پڑتال کا آج آخری روز

ترجمان الیکشن کمیشن آف پاکستان کا کہنا ہے کہ امیدواروں کے کاغذات نامزدگی کی جانچ پڑتال کا وقت بڑھانے کی کوئی تجویز زیر غور نہیں۔

خبر رساں ادارے تسنیم کے مطابق عام انتخابات 2018 کے لیے امیدواروں کے کاغذات نامزدگی کی جانچ پڑتال کا آج آخری روز ہے۔

ترجمان الیکشن کمیشن الطاف خان نے اپنے بیان میں کہا کہ جانچ پڑتال کا وقت بڑھانے کی کوئی تجویز زیرغور نہیں۔ 

الیکشن کمیشن نے 11 جون تک امیدواروں کے کاغذات نامزدگی وصول کیے تھے، جس کے بعد ان کی جانچ پڑتال کا عمل شروع کیا گیا۔

گزشتہ روز الیکشن کمیشن ذرائع کے حوالے سے رپورٹ سامنے آئی تھی کہ 2013 کے مقابلے میں 2018 کے عام انتخابات کے لیے کاغذات نامزدگی جمع کرانے والے امیدواروں کی تعداد میں 7 ہزار کے قریب کمی واقع ہوئی ہے۔

ذرائع کے مطابق 2013 میں 28 ہزار 302 امیدواروں نے کاغذات جمع کرائے تھے جب کہ انتخابات 2018 کے لیے 21 ہزار 482 امیدواروں نے کاغذات جمع کرائے ہیں۔ 

یاد رہے کہ 25 جولائی کو ہونے والے آئندہ عام انتخابات میں حصہ لینے والے امیدواروں کے لیے بیان حلفی جمع کرانا لازمی قرار دیا گیا ہے جس کے پیش نظر کئی سیاستدانوں نے کاغذات نامزدگی جمع ہی نہیں کرائے، خاص طور پر سیف اللہ فیملی نے بھی اسی وجہ سے انتخابات نہ لڑنے کا اعلان کیا ہے۔ 

اہم ترین پاکستان خبریں
اہم ترین خبریں
خبرنگار افتخاری