عام انتخابات کے دن "کریم" کی جانب سے مفت سواری
آن لائن سفر کی سہولیات فراہم کرنے والی کمپنی "کریم" عام انتخابات کے دن یعنی آج 25 جولائی کو لوگوں کو مفت سواری فراہم کر رہی ہے۔
خبر رساں ادارے تسنیم کے مطابق جی ہاں، کریم سروس کے کپتان عام انتخابات کے دن لوگوں کو اپنے گھروں سے مفت اٹھاکر ان کے پولنگ اسٹیشن پہنچارہے ہیں۔
ساتھ ہی کریم کے رضاکار ووٹ کاسٹ کرنے والے افراد کو فری میں گھر بھی پہنچائیں گے۔
کریم نے اپنی فیس بک پوسٹ کے ذریعے اس بات کی تصدیق کی کہ پولنگ والے دن 25 جولائی کو ان کے رضاکار لوگوں کو اپنے گھروں سے پولنگ اسٹیشن اور پھر وہاں سے گھر تک مفت پہنچائیں گے۔
کریم نے اس سروس کو جمہوریت کار یا جمہوریت سروس کا نام دیا ہے۔
کریم نے عام انتخابات کے دن لوگوں کو مفت سواری فراہم کرنے کے حوالے سے گزشتہ ہفتے اعلان کرتے ہوئے رضاکاروں کو ایک فارم فل کرنے کی درخواست کی تھی۔
کریم کی درخواست پر کئی افراد نے رضاکارانہ خدمات دینے کے لیے فارم فل کیا، جس کے بعد کمپنی نے عام انتخابات کے دن مفت سواری فراہم کرنے کا اعلان کردیا۔
کمپنی نے رضاکاروں کو درخواست فارم فل کرنے کی گزارش کرتے وقت بتایا تھا کہ مفت سواری کی سروس ملک کے 11 شہروں میں فراہم کی جائے گی۔
کمپنی نے جن شہروں میں مفت سروس فراہم کرنے کا اعلان کیا تھا ان میں کراچی، لاہور، اسلام آباد، پشاور، کوئٹہ، راولپنڈی، ملتان، فیصل آباد، حیدرآباد، سیال کوٹ، گوجرانوالہ اور ایبٹ آباد شامل ہیں۔
اس سہولت سے فائدہ حاصل کرنے کے خواہش مند افراد کو معمول کی طرح آن لائن ایپلی کیشن کے ذریعے جمہوریت کار کی بکنگ کرانی پڑے گی۔
خیال رہے کہ کریم کی طرح ملک کے بڑے اور معروف ریسٹورنٹس نے بھی پولنگ کے دن ووٹ کاسٹ کرنے والے افراد کو مفت اور رعایتی کھانے فراہم کرنے کی پیش کش کی ہے۔
