صدر روحانی کا عمران خان کو ٹیلی فون، دورہ ایران کی دعوت

خبر رساں ادارے تسنیم کے مطابق صدر حسن روحانی نے عمران خان کو ٹیلی فون کیا اور الیکشن میں‌ کامیابی پر مبارک باد دی.

دونوں رہنماؤں کی گفتگو میں پاک ایران تعلقات اور باہمی دل چسپی کے امورپرتبادلہ خیال کیا گیا.

اس موقع پر ایرانی صدر نے کہا کہ پاکستان ایران فقط ہمسایے نہیں ہیں، مذہبی اور ثقافتی بندھن سے جڑے ہیں.

حسن روحانی نے کہا کہ پاک ایران تعلقات میں مزید پختگی اور اضافے کےخواہاں ہیں. اس موقع پر ایرانی صدر نے عمران خان کوایران کے دورے کی دعوت بھی دی.

عمران خان نے ایرانی صدر کی دورے کی دعوت قبول کرتے ہوئے شکریہ ادا کیا.

عمران خان نے کہا کہ پاکستان ایران سےخصوصی تجارتی تعلقات قائم کرنا چاہتا ہے، پاکستان ایران کےساتھ سفارتی تعلقات میں مزید بہتری کاخواہش مند ہے.

یاد رہے کہ گذشتہ دونوں‌ پی ٹی آئی چیئرمین عمران خان سے پاکستان میں تعینات ایرانی سفیر مہدی ہنردوست نے ملاقات کی تھی اور ایرانی صدر کا مبارک باد کا پیغام پہنچایا تھا.

اس موقع پر پی ٹی آئی چیئرمین نے کہا تھا کہ اپنی سالمیت کے تحفظ کے لئے ایران کا کردار قابل تحسین ہے، ایران اور سعودی عرب کے لئے تعمیری، مثبت کرداراداکرنے کو تیار ہیں.