طاہرالقادری کا نئی حکومت سے سانحہ ماڈل ٹاؤن کے قاتلوں کو سزا دینے کا مطالبہ

تسنیم خبررساں ادارے کی رپورٹ کے مطابق، سربراہ پی اے ٹی کا کہنا تھا کہ تحریک انصاف کی حکومت سے مطالبہ ہے کہ ماڈل ٹاؤن کے قاتلوں کو سزا دے، سانحہ ماڈل ٹاؤن کے انصاف کے راستے میں 116 پولیس افسر رکاوٹ ہیں۔

انہوں نے کہا کہ اب قاتلوں کی نہیں انصاف دلانے والوں کی حکومت ہے، سانحہ کے ذمہ دار کسی ایک بھی مجرم کو اب تک سزا نہیں ملی۔

طاہرالقادری کا کہنا تھا کہ شہدا کو انصاف کی فراہمی کے لیے 116 پولیس افسران کو معطل کیا جائے، نئی حکومت کے لیے پہلا ٹیسٹ 116 پولیس افسران کی معطلی ہے، قاتل پولیس افسران کو عہدوں سے ہٹا کر گھر بھیج دیا جائے۔

اس موقع پر انہوں نے نوازشریف کی اہلیہ بیگم کلثوم نواز کی مغفرت اور درجات کی بلندی کی دعا کی، طاہرالقادری کا کہنا تھا کہ مرحومہ کے پسماندگان سے اظہار تعزیت کرتے ہیں۔

ہالینڈ میں منسوخ کیے گئے گستاخانہ خاکوں کے مقابلے سے متعلق تبصرہ کرتے ہوئے ان کا کہنا تھا کہ گستاخانہ خاکوں کا مقابلہ رکوانے میں پی اے ٹی کا اہم کردار رہا۔