پاک روس مشترکہ فوجی مشقوں کا آغاز

پاک فوج کے شعبہ تعلقات عامہ (آئی ایس پی آر) کی جانب سے جاری بیان میں بتایا گیا کہ روسی دستہ پاک-روس مشترکہ فوجی مشقوں ’دروزھبا-3‘ میں حصہ لینے پاکستان پہنچ چکا ہے۔

خیبر پختونخوا کے ضلع پبی میں قائم نیشنل کاؤنٹر ٹیررازم سینٹر میں ہونے والی مشقوں میں حصہ لینے کے لیے روس کا 70 رکنی دستہ پاکستان پہنچ گیا جو 4 نومبر تک جاری رہیں گی۔

خیال رہے کہ ان مشقوں کا آغاز 2016 میں کیا گیا جس کے پہلے حصے کی میزبانی پاکستان نے کی تھی جبکہ دوسرے حصے کا انعقاد روس میں ہوا تھا۔

ان جنگی مشقوں کا مقصد دونوں ممالک کی افواج کے درمیان تعاون کو مضبوط کرنا اور خاص طور پر انسدادِ دہشت گردی کے شعبے میں پیشہ وارانہ قابلیت کا تبادلہ کرنا ہے۔

روس اور پاکستان کے درمیان دفاعی تعلقات میں 2014 میں ہونے والے دفاعی تعاون کے معاہدے پر دستخط کے بعد اضافہ ہوا ہے۔

اس دفاعی سمجھوتے میں عسکری شعبے کے مختلف حصوں میں تعاون بڑھانے کے ساتھ دونوں ممالک کا بین الاقوامی سیکیورٹی اور انسدادِ دہشت گردی کے بھرپور اقدامات کرنا تھا۔

یاد رہے کہ رواں برس کے آغاز میں اسلام آباد اور ماسکو نے عسکری تعاون میں فروغ کے لیے ایک کمیشن قائم کیا تھا جو دونوں ممالک کے درمیان دفاعی تعاون کا اعلیٰ ترین فورم ہے۔

اس کمیشن کے پہلے اجلاس میں اس بات پر اتفاق کی گیا تھا کہ پاکستانی فوجی روسی عسکری اداروں میں پیشہ وارانہ تربیت حاصل کریں گے۔