پاک چین اقتصادی راہداری سے خطے کے تمام ممالک کو فائدہ ہوگا، ملیحہ لودھی

تسنیم خبررساں ادارے کی رپورٹ کے مطابق، اقوام متحدہ میں پاکستانی مندوب ملیحہ لودھی نے جنرل اسمبلی کی مالی امورکی کمیٹی سے خطاب کرتے ہوئے کہا کہ سی پیک کا مقصد مشترکہ معاشی وترقیاتی اہداف کا حصول ہے۔

ملیحہ لودھی نے کہا کہ سی پیک منصوبہ جنوب جنوب تعاون کی غیرمعمولی مثال ہے، جنوب جنوب تعاون شمال جنوب تعاون کا متبادل نہیں ہے۔

پاکستانی سفیر نے کہا کہ پاکستان ترقی پذیرممالک کے درمیان تعاون کواہمیت دیتا ہے، کئی ترقی پذیر ممالک کوتکنیکی سپورٹ، وسائل مہیا کررہے ہیں۔

انہوں نے کہا کہ پیداواری صلاحیت میں اضافے کے لیے تعاون ضروری ہے، اقوام متحدہ دیرپا ترقی کے مقاصد کے حصول پر توجہ مرکوز رکھے۔

انہوں نے فلسطین میں اسرائیلی فوج کی ظلم و بربریت کی شدید الفاظ میں مذّمت کی اورکہا غزہ میں پُرامن فلسطینی مظاہرین کا خون بہایا جا رہا ہے، اسرائیلی بستیوں کی غیرقانونی توسیع بلاروک ٹوک جاری ہے۔

یاد رہے کہ گزشتہ ہفتے اقوام متحدہ میں پاکستان کی مستقل مندوب ملیحہ لودھی کا کہنا تھا کہ فلسطینیوں کی انسانی بنیادوں پرامداد کوسیاسی مفادات کی بھینٹ نہ چڑھایا جائے۔