چینی قونصل خانے پر حملے میں ملوث دہشت گرد کے دو بھائی خاران سے گرفتار

تسنیم خبررساں ادارے کی رپورٹ کے مطابق، کراچی میں قائم چینی قونصل خانے پر حملے میں سیکیورٹی فورسز کی جوابی کارروائی میں مارے جانے والے دہشت گرد عبدالرزاق بلوچ کے دو 2 بھائیوں کو صوبہ بلوچستان کے علاقے خاران سے گرفتار کرلیا۔
ذرائع کے مطابق قانون نافذ کرنے والے اداروں کے اہلکاروں نے خاران کے مختلف حصوں میں چھاپہ مار کارروائیاں کیں اور ملزم کے 2 بھائیوں محمد اسلم اور خوستی کو گرفتار کرلیا اور انہیں تفتیش کے لیے حکام کے حوالے کردیا۔
بلوچستان کے وزیر داخلہ میر سلیم احمد کھوسہ کا کہنا تھا کہ 2 سال قبل عبدالرزق بلوچ کا نام لاپتہ ہونے والے افراد کی فہرست میں درج کرایا گیا تھا۔
انہوں نے الزام لگایا کہ صوبے کے لاپتہ افراد کی بڑی تعداد بیرون ملک مقیم ہے جہاں وہ دہشت گردی کی ٹرینگ حاصل کررہے ہیں۔
صوبائی وزیر کا مزید کہنا تھا کہ بی ایل اے کمانڈر سلیم عرف اچھو گزشتہ سال سیکیورٹی اداروں سے مقابلے میں زخمی ہوئے تھے لیکن فرار ہونے میں کامیاب ہوگئے تھے، جس کے بعد وہ بھارت چلے گئے جہاں انہیں علاج کی سہلولت فراہم کی گئی۔
ان کا کہنا تھا کہ بی ایل اے کے متعدد کمانڈر سیکیورٹی فورسز کے آپریشنز میں مارے جاچکے ہیں، صوبائی وزیر کا کہنا تھا کہ بھارت براہ راست بلوچستان میں امن و امان کی صورت حال خراب کروانے میں ملوث ہے۔
انہوں نے مزید کہا کہ دشمن کے ارادوں کو اسی طرح ناکام بنا دیا جائے گا جیسے کے چینی قونصل خانے پر حملے کے دوران بنایا گیا۔