ایرانی نائب وزیرخارجہ کا دورہ پاکستان، مشترکہ اعلامیہ جاری

تسنیم خبررساں ادارے کی رپورٹ کے مطابق، پاکستان اور ایران نے افغان قوتوں کی سربراہی میں افغانستان میں امن کے لیے کی جانے والی کوششوں کی مکمل حمایت کرنے کا اعلان کیا۔

اجلاس کے حوالے سے جاری اعلامیے میں کہا گیا کہ ’اس بات کا ادراک کیا گیا ہے کہ افغانستان میں امن کے لیے افغان قوتوں کی سربراہی میں کی جانے والی کوششیں ہی پاکستان اور ایران کو درپیش سنگین سیاسی و اقتصادی سے نبرد آزما ہونے کا بہترین طریقہ ہے۔

دونوں پڑوسی ممالک نے افغانستان کے معاملے میں اپنے بنیادی مفادات کے تحفظ کے لیے ہم آہنگ نقطہ نظر رکھنے پر اتفاق کیا۔

دونوں ممالک نے افغانستان میں غیرمستحکم صورتحال کے باعث نئی دہشت گرد تنظیموں مثلاً داعش کے سر اٹھانے پر تشویش کا اظہار بھی کیا۔

اس کے ساتھ فریقین نے افغان تنازع کے سبب پاکستان اور ایران کو درپیش سنگین چیلنجز، مثال کے طور پر منشیات کی تجارت، غیر قانونی ہجرت اور مہاجرین کے مسئلے پر بھی گفتگو کی۔

خیال رہے کہ اسلامی جمہوریہ ایران کے نائب وزیر خارجہ سید عباس عراقچی اور پاکستان کی خارجہ سکریٹری تہمینہ جنجوعہ نے سیاسی مذاکرات کے دسویں دور میں اپنے اپنے ملکوں کے وفد کی قیادت کی-

اجلاس میں باہمی تجارت میں اضافے کے حوالے سے دونوں ممالک کے درمیان گزشتہ ملاقاتوں میں طے کیے گئے سمجھوتے پر کئے جانے والے اقدامات کا بھی جائزہ لیا گیا۔

واضح رہے کہ دونوں ممالک میں سالانہ تجارت 5 ارب ڈالر تک کرنے کا سمجھوتہ موجود ہے جس کے لیے تاجر برادری کو سہولیات کی فراہمی، تجارت میں حائل رکاوٹوں کو دور کرنے اور اہم تجارتوں پر سہولیات فراہمی کی رفتار تیز کرنے کا فیصلہ کیا گیا تھا۔

اس کے ساتھ اس بات پر بھی اتفاق کیا گیا کہ مشترکہ اقتصادی کمیشن کا 21واں اجلاس آئندہ برس ہوگا جس میں دونوں ممالک کے درمیان ریلوے کے حوالے سے مزید اقدامات پر غور کیا جائے گا۔

اعلامیے کے مطابق گفتگو میں ہر سال پاکستان سے ایران- عراق جانے والے ہزاروں زائرین کی سہولیات کے حوالے سے بھی بت چیت کی گئی۔