وزیر اعظم عمران خان کراچی پہنچ گئے

تسنیم خبررساں ادارے کی رپورٹ کے مطابق پاکستان کے وزیر اعظم عمران خان  اسلام آباد سے کراچی پہنچ گئے، گورنر سندھ اور دیگر اعلیٰ حکام نے وزیر اعظم کا استقبال کیا۔

وزیر اعظم گورنر ہاوس میں مصروف دن گزاریں گے،  وزیر اعظم گورنر ہاوس میں صنعت کاروں، کاروباری شخصیات اور پی ٹی آئی ارکان اسمبلی سمیت دیگر وفود سے ملاقات کریں گے۔

وزیر اعظم کو گورنر ہاوس میں شہر قائد کے ترقیاتی کاموں تجاوزات کے خلاف جاری آپریشن اور دیگر امور پر بریفنگ دی جائے گی، وزیر اعظم عمران خان کی متحدہ قومی موؤمنٹ پاکستان کے وفد سے بھی ملاقات متوقع ہے۔

خیال رہے کہ عمران خان کو وزارت عظمیٰ کا منصب سنبھالنے کے بعد شہر قائد کا یہ دوسرا دورہ ہے، جس دوران وزیر اعظم گورنر سندھ اور وزیر اعلیٰ سندھ مراد علی شاہ سے بھی ملاقات کریں گے۔

واضح رہے کہ وزیرِ اعظم بننے کے بعد عمران خان نے کراچی کا اپنا پہلا ایک روزہ دورہ 16 ستمبر کو کیا تھا، انھوں نے دورے کا آغاز مزارِ قائد پر حاضری سے کیا، انھوں نے مزارِ قائد پر فاتحہ خوانی کی اور گل دستہ بھی رکھا جب کہ انھوں نے مہمانوں کی کتاب میں تاثرات بھی قلم بند کیے تھے۔