ہماری اولین ترجیح چھوٹی اور درمیانی درجے کی صنعتوں کو بہتر کرنا ہے، عمران خان

تسنیم خبررساں ادارے کی رپورٹ کے مطابق، ان خیالات کا خان صاحب نے اسلام آباد میں ایف پی سی سی آئی کی تقریب سے خطاب کرتے ہوئے کیا، وزیر اعظم نے کہا کہ ماضی کے حکمرانوں نے تجارت اور برآمدات کے حوالے سے سوچا ہی نہیں۔

ہم تاجروں اور برآمد کنندگان کی آسانی کیلئے کام کررہے ہیں، پاکستان میں اب تک جو غلطیاں ہوئیں انہیں ٹھیک کرنا چاہتے ہیں، ملک میں سرمایہ کاری اورتجارت سے خوشحالی آئے گی۔

پاکستانی وزیر اعظم کا مزید کہنا تھا کہ پاکستان کی برآمدات24ارب ڈالر کے قریب ہیں، ملائیشیا کی برآمدات220ارب ڈالر تک پہنچ چکی ہیں، پاکستان میں تجارت کیلئے مشکل ماحول رہا ہے، تجارتی شعبے میں مشکلات سے چھوٹی صنعتوں کو نقصان پہنچتا ہے، ہماری اولین ترجیح چھوٹی اور درمیانی درجے کی صنعتوں کو بہتر کرنا ہے۔

پاکستانی وزیر اعظم نے سابقہ حکومت پر تنقید کرتے ہوئے کہا کہ گزشتہ حکومت کی جانب سےبڑاتجارتی خسارہ ورثے میں ملا، تجارتی خسارے کو کم کرنے کیلئے دن رات کام کررہے ہیں، پاکستان میں تجارت کے مواقع کو بہتر بنانا چاہتے ہیں۔

انہوں نے کہا کہ کاروباری طبقے اور برآمد کنندگان کی ہرممکن مدد کریں گے، کامیابی کا راز ہے کہ غلطیوں سے سبق سیکھا جائے، سوچ میں تبدیلی مستقبل کےلئےاہم ہے۔