ترکی امریکا کی دھمکیوں سے ڈرنے والا نہیں، ترک وزیرخارجہ

تسنیم خبررساں ادارے کے مطابق، ترک وزیر خارجہ نے امریکی صدر کے حالیہ بیان پرشدید ردعمل دیتے ہوئے کہا دفاعی نوعیت کے معاملات سے متعلق سوشل میڈیا یا ٹویٹر پربات نہیں کی جاتی۔

میولوت چاوش اوغلو نے ڈونلڈ ٹرمپ کی دھمکیوں کو مسترد کرتے ہوئے کہا کہ امریکی صدراس طرح کے بیانات پہلے بھی کئی بار دے چکے ہیں، وہ اس سے ڈرنے والے نہیں۔

ترک وزیر خارجہ کا کہنا تھا کہ امریکا نے پہلے بھی ترکی پراقتصادی پابندیاں عائدکی تھیں،جو ناکام ہوگئی تھیں۔

یاد رہے کہ امریکی صدر ڈونلڈ ٹرمپ نے 14 جنوری کو ٹویٹر پراپنے پیغام میں کہا تھا کہ شام سے امریکی فوج کا انخلا شروع ہوگیا ہے اور اگر ترکی نے کردوں کو نشانہ بنایا تو امریکا ترکی کو اقتصادی طور پر تباہ کردے گا۔

ڈونلڈ ٹرمپ کا کہنا تھا کہ دولت اسلامیہ کے شدت پسندوں کو فضا سے نشانہ بنایا جائے اورانہوں نے 20 میل تک ایک سیف زون بنانے کا بھی مطالبہ کیا تھا۔

واضح رہے کہ شام میں امریکا نے 2015 میں فوج بھیجی تھی، اس وقت کے صدر برارک اوباما کا کہنا تھا کہ وائے پی جی کے جنگجوؤں کوتربیت دینے کے لیے کچھ فوجی بھیجے گئے ہیں۔