بلوچستان میں شدید بارش کے بعد سیلاب، ایمرجنسی نافذ

بلوچستان میں شدید بارش کے بعد سیلاب نے تباہی مچادی، مکران اور لسبیلہ میں ایمرجنسی نافذ کردی گئی۔

بلوچستان میں شدید بارش کے بعد سیلاب، ایمرجنسی نافذ

تسنیم خبررساں ادارے کی رپورٹ کے مطابق، کوئٹہ سمیت، چمن، زیارت، خضدار، مکران اور دیگر شہروں میں گزشتہ کئی روز سے وقفے وقفے سے بارشوں کا سلسلہ جاری ہے اور لسبیلہ اور مکران میں سیلابی صورتحال ہے۔

ڈپٹی کمشنر لسبیلہ شبیر مینگل کا کہنا ہے کہ اوتھل میں سیلابی صورتحال کے باعث 4 افراد لاپتہ ہوگئے جبکہ ریسکیو ذرائع کے مطابق برساتی ریلے میں بہنے والے ایک شخص کی لاش نکال لی گئی۔

ڈپٹی کمشنر لسبیلہ کا کہنا ہے کہ حالیہ بارشوں کے باعث صورتحال کنٹرول میں ہے، بارشوں میں ہونے والے نقصان کا تخمینہ لگایا جارہا ہے، بارشوں میں کوئی جانی نقصان نہیں ہوا۔

شمالی بلوچستان میں طوفانی بارشوں کا سلسلہ تھم گیا تاہم ندی نالوں میں سیلابی صورتحال ہے اور سیلابی ریلے سے رابطہ سڑکوں کو شدید نقصان، ضلعی انتظامیہ چمن کا کہنا ہے کہ بارش کے بعد 40 سے زائد مکانات کو نقصان پہنچا۔

وادی زیارت، توبہ اچکزئی، توبہ کاکڑی اور کان مہترزئی میں برفباری کے بعد آمد و رفت کی بحالی کے لیے برف ہٹانے کا کام جاری ہے۔

خضدار میں سب سے زیادہ 41 ملی میٹر بارش ریکارڈ کی گئی جہاں برساتی نالے بپھر گئے جب کہ مکران اور ضلع لسبیلہ میں ایمرجنسی نافذ کردی گئی جہاں پھنسے لوگوں کو نکالنے کے لیے ریسکیو ٹیمیں روانہ کردی گئیں۔

محکمہ موسمیات کے مطابق لسبیلہ میں 28، سبی 21، تربت 18، قلات میں 15، گوادر میں 13، ڑوب 12، جیوانی 4 اور پنجگور میں ایک ملی میٹر بارش ریکارڈ کی گئی ہے۔

حب ڈیم انتظامیہ کے مطابق رات گئے ہونے والی بارش سے ڈیم میں پانی کی سطح ڈیڑھ فٹ تک بلند ہوگئی اور ڈیم میں اس وقت ڈھائی فٹ پانی کا ذخیرہ موجود ہے۔

دوسری جانب چترال میں برفباری کے باعث لواری ٹنل اور بالائی علاقوں کی متعدد رابطہ سڑکیں ٹریفک کے لئے بند کردی گئیں۔

گلیات میں گزشتہ شام سے ایک فٹ تک برف پڑ چکی ہے جس کا دیگر علاقوں سے رابطہ منقطع ہوگیا جب کہ مانسہرہ میں شاہراہ قراقرم کھولنے کے لیے امدادی کارروائیاں جاری ہیں۔

سب سے زیادہ دیکھی گئی پاکستان خبریں
اہم ترین پاکستان خبریں
اہم ترین خبریں
خبرنگار افتخاری