پاکستان اور ایف اے ٹی ایف کے مذاکرات کل اسلام آباد میں شروع ہوں گے

تسنیم خبررساں ادارے کی رپورٹ کے مطابق،  ایشیاء پیسفک گروپ کے وفد کی سربراہی ایگزیکٹو سیکریٹری گارڈن ہک کریں گے اور 9 رکنی وفد پاکستان سے مذاکرات کرے گا۔

اسکاٹ لینڈ یارڈ کے ایئن کولنز، امریکی محکمہ خزانہ کے جیمز پرسنگ، مالدیپ کے فنانشنل انٹیلیجنس یونٹ کے اشرف عبداللہ،انڈونیشیا کی وزارت خزانہ کے بوبی واہو ہارناون، پیپلزبینک آف چائنا کے گانگ ینگ یانگ، ترکی کی وزارت انصاف کے مصطفیٰ نیک مادین، ڈپٹی ڈائریکٹر محمد الراشدان، ڈپٹی ڈائریکٹر شینان ردر فارڈ بھی مذاکرات میں شریک ہوں گے۔

ایف اے ٹی ایف وفد پاکستانی وزارت خزانہ، اسٹیٹ بینک اور ایف ایم یو حکام سے ملاقاتیں کرے گا جب کہ وفد کی ایف آئی اے، ایس ای سی پی اور دیگر حکام سے بھی ملاقاتیں ہوں گی۔

پاکستان کے ساتھ اجلاس میں دوسری میوچل ایوالیشن رپورٹ کا جائزہ لیا جائے گا، وفد مطمئن نا ہونے پر پاکستان کو آئی سی آر جی کا نیا ایکشن پلان دے سکتا ہے۔

دستاویزات میں بتایا گیا ہےکہ پاکستان نے پہلی رپورٹ میں مجموعی ریٹنگ میں بہتری کی سفارش کی تھی، ایشیاء پیسفک گروپ نے پاکستان کی ریٹنگ میں بہتری نہیں کی۔

فنانشل ایکشن ٹاسک فورس کے ارکان کی تعداد 37 ہے جس میں امریکا، برطانیہ، چین، بھارت اور ترکی سمیت 25 ممالک، خیلج تعاون کونسل اور یورپی کمیشن شامل ہیں۔