یورپ نے معاشی تعلقات بحال نہ کیا توایران سخت اقدام کرے گا، ظریف

تسنیم نیوز کے مطابق اسلامی جمہوریہ ایران کے وزیرخارجہ نے نے یورپی ممالک کے رہنماؤں سے مطالبہ کیا کہ وہ امریکی پابندیوں کے باوجود تہران سے معاشی تعلقات بحال کریں یا قانونی کارروائی کے لیے تیار رہیں۔

ایران کے وزیر خارجہ نے کہا ہے کہ یورپی ممالک اس مقام پر نہیں ہیں کہ ایران پر حتی ان شعبوں میں جن کا جوہری معاہدے سے کوئی تعلق بھی نہیں ہے نکتہ چینی کریں۔

اسلامی جمہوریہ ایران کے وزیر خارجہ محمد جواد ظریف نےآج اتوار کے روز تہران میں منعقدہ پروگرام کے موقع پر اس جانب اشارہ کرتے ہوئے کہ جوہری معاہدے میں اقدام اہم نہیں بلکہ نتیجہ اہمیت کا حامل ہوتا ہے کہا کہ یورپی ممالک اورجوہری معاہدے کے دیگر رکن ممالک پر یہ ذمہ داری بنتی ہے کہ وہ ایران کے اقتصادی روابط کو معمول پر لائیں۔

محمد جواد ظریف نے مغربی ایشیاء کے علاقے میں مغربی ممالک کی مداخلت پرکڑی نکتہ چینی کرتے ہوئے کہا کہ مغربی ممالک کی مداخلت پسندانہ پالیسیوں کا نتیجہ سوائے نقصان کے اور کچھ نہیں نکلا ہے۔

اس موقع پر انہوں نے عنقریب غیرملکی حکام کے دورہ ایران کا حوالہ دیتے ہوئے کہا کہ جاپانی وزیر اعظم اور جرمن وزیر خارجہ کے دورہ تہران، صدر حسن روحانی کے دورہ بشکیک اور دوشنبہ اور ان ممالک کے صدور اور اعلی حکام سے ملاقاتیں، اپنی پالیسی پر روشنی ڈالنے اور تمام ممالک کے خلاف ظالمانہ پالیسیوں سے مقابلہ کرنے کے لئے ایک مناسب موقع ہے.

واضح رہے کہ جاپان کے وزیراعظم 12 جون کو ایرانی حکام سے ملاقات و گفتگو کرنے کیلئے ایران کا دورہ کریں گے۔ جبکہ جرمنی کے ورزیر خارجہ کل پیر کے روز تہران پہنچ رہے ہیں۔