واپسی مارچ؛ صہیونی فوج کی فائرنگ سے ایک فلسطینی شہید درجنوں شدید زخمی
فلسطینی ذرائع کا کہنا ہے کہ واپس مارچ میں شریک نہتے فلسطینیوں پر غاصب صہیونی فوج کے اہلکاروں نے فائرنگ کی ہے جس کے نتیجے میں درجنوں افراد شدید زخمی ہوئے ہیں۔
تسنیم خبررساں ادارے نے فلسطین الیوم کے حوالے سے خبر دی ہے کہ 77ویں حق واپسی مارچ کے شرکاء پر صہیونی غاصب فوج کے اہلکاروں نے ایک بار پھر براہ راست فائرنگ کرکے «علاءنزار حمدان» کو شہید اور متعدد دیگر کو شدید زخمی کردیا ہے۔
الیوم نیوز کے مطابق اسرائیلی فوج نے مظاہرین پر براہ راست فائرنگ کی جس کے نتیجے میں 40 افراد کو گولیاں لگیں۔
واضح رہے کہ فلسطینی عوام نے اپنے حقوق کی بازیابی کے لئے تیس مارچ دو ہزار اٹھارہ سے گرینڈ واپسی مارچ کا آغاز کیا تھا جس کے تحت ہزاروں افراد ہر جمعے کو غزہ سے ملنے والی مقبوضہ فلسطین کی سرحدوں کی جانب مارچ کرتے ہیں۔
واپسی مارچ میں اب تک سینکڑوں فلسطینی شہید اور کم سے کم 32 ہزار زخمی ہوئے ہیں۔
اس مارچ کا مقصد امریکی سفارت خانے کی بیت المقدس منتقلی اورغزہ کے ظالمانہ محاصرے کے خلاف احتجاج کرنا ہے۔
غاصب اسرائیل نے سن دو ہزار چھے سے غزہ کا محاصرہ کر رکھا ہے اور وہ وہاں بنیادی اشیا کی ضرورت کی ترسیل کی راہ میں شدید رکاوٹیں پیدا کر رہا ہے جس کے نتیجے میں غزہ کے فلسطینیوں کو غذائی اشیا، ادویات اور دواؤں کی شدید قلت کا سامنا ہے۔
