پاک بھارت مسلح افواج کے مابین جھڑپیں

تسنیم خبر رساں ادارے کے مطابق،لائن آف کنٹرول سماہنی سیکٹر میں بھارتی فوج کی جانب سے شہری آبادی پر بھاری ہتھیاروں سے گولہ باری گئی۔

جمعہ کی شام 6بجے بھارتی فورسز نے کنٹرول لائن سے متصل سونا ویلی، بڑھو، ڈنہ اور چاہی کے علاقوں میںگولہ باری کی جس میں چند ایک رہائشی مکانات جزوی طور پر متاثر ہوئے جبکہ مکئی کی فصلوں اور کھیتوں کو نقصان پہنچا۔

 مقامی ذرائع کا کہنا ہے کہ دھماکوں کی آوازیں دور دور تک سنائی دیتی رہی، تاہم شہری آبادی کسی بھی جانی و مالی نقصان سے محفوظ رہی۔

 سیز فائر کی خلاف ورزی پر بھارتی فوج کی فائرنگ کا جواب دیا گیا جس سے بھارتی فوج کے متعدد مورچے تباہ ہوگئے۔

دوران گولہ باری انتظامیہ اور ریسکیو ٹیمیں متحرک رہی، انتظامی آفیسر کلیم عباس نے میڈیا کو بتایا کہ بھارتی گولہ باری کے نتیجہ میں بڑھو اور دیگر مقامات پر چند ایک مقانات کو جزوی نقصان پہنچا تاہم شہری آبادی جانی نقصان سے محفوظ رہی۔

مقامی ذرائع کے مطابق، کنٹرول لائن سماہنی سیکٹر میں گولہ باری اور فائرنگ کا سلسلہ وقفہ وقفہ سے جاری ہے۔

 دریں اثناء بھارتی فوج کی جانب سے کنٹرول لائن سماہنی سیکٹر کے گاوں بنڈالہ ڈیریاں کی سول آبادی پر داغا گیا آر آر رائفل کا گولہ بلاسٹ نہ ہو سکا ،بلائنڈ گولے کی اطلاع مقامی رہائشی مرزا محمد رفیق نے اسسٹنٹ کمشنر سماہنی کو کی جس پر کارروائی کرتے ہوئے محکمہ شہری دفاع بم ڈسپوزل کے عملے نے بروقت موقع پر پہنچ کر خطرناک 1.5آر آر مس گولے کو ناکارہ بنا کر محفوظ مقام پر منتقل کر دیا۔

واضح رہے کہ  ایل او سی پر بھارتی فوج کی آئے روز بلااشتعال فائرنگ وگولہ باری نے مکینوں کی زندگیوں کو مکمل اجیران بنادیا ہے۔

ایل اوسی مکینوں نے حکومت پاکستان، عالمی برداری اور اقوام متحدہ سے پرزور مطالبہ کیا ہے کہ وہ ایل اوسی پر آباد سویلین آبادی پر بھارتی فوج کی جارحیت کا سختی سے نوٹس لے اور یہ سلسلہ فوری بند کروائے۔