وزیراعظم عمران خان کا دیامیر بھاشا ڈیم کے تعمیراتی مقام کا دورہ

تسنیم خبررساں ادارے کی رپورٹ کے مطابق، وزیر اعظم عمران خان نے پن بجلی کے منصوبے دیامیر بھاشا ڈیم کی تعمیر کا جائزہ لینے کا فیصلہ کر لیا ہے۔

مقامی ذرائع کا کہنا ہے کہ وزیر اعظم دیامیر بھاشا ڈیم کی تعمیراتی کام کی رفتار اور اس کے معیار کا جائزہ لیں گے، آبی ذخائر کی ترقی سے ترقی یافتہ ممالک کی صف میں شمولیت وزیر اعظم کا ویژن ہے، وزیر اعظم کا خواب ہے کہ پاکستان خود 50 ہزار میگا واٹ تک بجلی پیدا کرے۔

دریائے سندھ پر تعمیر ہونے والا یہ ڈیم دنیا کا سب سے بڑا آر سی سی ہوگا، دیامیر بھاشا ڈیم 81 لاکھ ایکڑ فٹ پانی ذخیرہ کرنے کے کام آئے گا، ڈیم میں ذخیرہ پانی میں سے 64 لاکھ ایکڑ استعمال میں لایا جا سکے گا۔

ڈیم کی تعمیر سے پاکستان کے پانی ذخیرہ کی صلاحیت 30 سے بڑھ کر 48 دن ہو جائے گی، اس ڈیم سے سالانہ 18 ارب 10 کروڑ یونٹس سستی ترین بجلی بھی میسر آئے گی، دیامیر بھاشا ڈیم 30 لاکھ ایکڑ رقبے کو سیراب کرنے کے لیے پانی فراہم کرے گا۔

ڈیم مجموعی طور پر 4500 میگا واٹ بجلی کی پیداواری صلاحیت کا حامل ہے، ڈیم سے بجلی پیدا کر کے تیل کی مد میں سالانہ 2.48 ارب ڈالرز کی بچت ہوگی۔