کرونا کےخلاف کامیاب حکمت عملی سے پاکستان کا نام روشن ہوگیا، منیر اکرم

تسنیم خبررساں ادارے کے مطابق، اقوام متحدہ میں پاکستانی مشن کے زیر اہتمام میڈیا کے لیے ایک غیر رسمی تقریب ہوئی جس میں مستقل مندوب نے جنرل اسمبلی کے 75 ویں اجلاس سے متعلق آگاہ کیا۔

منیر اکرم کا کہنا تھا کہ رواں سال جنرل اسمبلی کا سیشن ہائبرڈ ہو گا،سر براہان کی تقریر ویڈیو لنک کے ذریعے نشر کی جائےگی۔انہوں نے بتایا کہ پاکستان مختلف فورمز پر اپناموقف بھرپور انداز میں پیش کرے گا۔

اقوام متحدہ میں پاکستانی سفیر نے کہا کہ وزیراعظم کشمیری جدوجہد پر پاکستان کا موقف ایک بار پھر پیش کریں گے، وزیراعظم اسلامو فوبیا جیسے اہم مسائل پر بھی روشنی ڈالیں گے۔

منیر اکرم کا کہنا تھا کہ وزیراعظم فائنانسنگ فار ڈویلپمنٹ سمٹ سے بھی خطاب کریں گے، بائیو ڈائیورسٹی سمٹ سے بھی وزیراعظم 30 ستمبر کو خطاب کریں گے۔

اقوام متحدہ میں پاکستانی سفیر کا مزید کہنا تھا کہ پاکستان نے کرونا کے خلاف کامیاب حکمت عملی سے نام پیدا کیا۔