ٹرمپ کے داماد کا دورہ عراق
امریکی حکام نے بتایا ہے کہ امریکی صدر ٹرمپ کے داماد اور سینیئر مشیر جیرڈ کشنر امریکہ کے جوائنٹ چیفس آف اسٹاف جنرل جوزف ڈنفورڈ کے ہمراہ عراق کا دورہ کر رہے ہیں۔
خبر رساں ادارے تسنیم کے مطابق وائٹ ہاؤس کے ایک سینیئر عہدیدار نے کہا کہ صدر ڈونلڈ ٹرمپ کے داماد اور سینیئر مشیر جیرڈ کشنر عراق میں ہیں۔
جیرڈ کشنر ایک ایسے وقت عراق کا دورہ کر رہے ہیں جب حالیہ مہینوں میں یہاں داعش کے خلاف امریکی فضائیہ کی کارروائیوں میں اضافہ ہوا ہے۔
جب کہ صدر ڈونلڈ ٹرمپ داعش کو شکست دینے کے عزم کا اظہار کر چکے ہیں اور اسی سلسلے میں مارچ میں امریکہ کی میزبانی میں داعش کے خلاف برسرپیکار 68 ممالک پر مشتمل اتحاد کے نمائندوں کا واشنگٹن میں اجلاس بھی ہوا۔
جیرڈ کشنر کے دورہ عراق سے متعلق تفصیلات سے تو آگاہ نہیں کیا گیا، تاہم عراق میں دہشت گرد تنظیم ’داعش‘ کے خلاف جنگ ممکنہ طور پر ایجنڈے میں شامل ہو گا۔
داعش کے خلاف لڑائی میں مصروف عراقی فورسز کو امریکی قیادت میں قائم فوج اتحاد کی طرف سے فضائی مدد حاصل ہے۔
امریکی فضائیہ داعش کے ٹھکانوں کو نشانہ بناتی آئی ہے۔
خیال رہے کہ جیرڈ کشنر کے بارے میں بتایا جاتا ہے کہ وہ بھی ڈونلڈ ٹرمپ کی طرح ماضی میں کبھی حکومت کا حصہ نہیں رہے لیکن اُن کا شمار اب واشنگٹن میں نہایت بااثر افراد میں ہوتا ہے۔
واضح رہے کہ جیرڈ کشنر، ایوانکا ٹرمپ کے شوہر ہیں اور اُن کی اہلیہ کو بھی ٹرمپ انتظامیہ کی ایک بااثر خاتون کے طور پر دیکھا جاتا ہے۔
