پاکستان نیشنل شپنگ کارپوریشن کا پڑوسی ممالک تک فیری سروس شروع کرنے کا فیصلہ

خبر رساں ادارے تسنیم کے مطابق ڈان نیوز کو حاصل ہونے والی دستاویزات کے مطابق یہ فیری سروس دبئی، مسقط، اومان، گوادر اور چاہ بہار تک شروع کی جائیگی۔

دستاویزات کے مطابق فیری سروس ابتدائی طور پر کراچی سے گوادر اور چاہ بہار تک شروع کی جائیگی۔

پی این ایس سی نے مسافروں کی سہولیات اور سیکیورٹی کے لیے وزارت دفاع، وزارت خارجہ اور وزارت داخلہ سے رجوع کرلیا۔

دستاویزات کے مطابق مسافروں کے لیے کینٹین، پارکنگ اور ریسٹ رومز کے لیے تمام پورٹ اتھارٹیز کو ہدایات جاری کردی گئیں۔

دستاویزات کے مطابق اس کے علاوہ فیریز کی خریداری کے لیے اسکروٹنی کا عمل شروع کردیا گیا۔

خیال رہے کہ 7 نومبر 2015 میں پاکستان اور ایران کے درمیان فیری سروس شروع کرنے سے متعلق معاملات طے پاگئے تھے۔

2014 میں فیری سروس زائرین کے لیے شروع کرنے کی تجویز دی گئی تھی البتہ اب اس سروس کو تجارتی مقاصد کے لیے بھی استعمال کیا جا سکے گا۔

ابتدا میں بلوچستان اور ایرانی سرحد کے ساتھ امن عامہ کی مخدوش صورتحال کے باعث پاکستان سے ایران جانے والی زائرین کے لیے اس سروس کی تجویز سامنے آئی تھی.

واضح رہے کہ چار عرب ممالک کی جانب  سے قطر پر سمندری، زمینی اور فضائی پابندیاں عائد کرنے کے باعث قطری حکومت نے دیگر ایشیائی ممالک سے تجارتی تعلقات بہتر بنانے شروع کردیے جن میں پاکستان سرفہرست ہے۔

قطر کی سرکاری کمپنی میلاہا نے رواں ہفتے سے کراچی تا دوحا تیز رفتار براہ راست بحری سروس شروع کرنے کا اعلان کیا تھا۔

پہلا بحری جہاز قطر کے حماد پورٹ سے چار روز کا سفر طے کرنے کے بعد 11 ستمبر پیر کے روز کراچی پہنچے گا۔