کراچی میں مظاہرین کومنتشر کرنے کیلیے پولیس کی ہوائی فائرنگ

خبر رساں ادارے تسنیم کے مطابق کراچی کے علاقے نمائش چورنگی پر مذہبی جماعتوں کا دھرنا آٹھویں روز میں داخل ہوگیا ہے۔ اسلام آباد میں فیض آباد دھرنے کے خلاف انتظامیہ کی جانب سے کیے جانے والے آپریشن کے بعد کراچی میں دھرنے کے شرکا کی جانب سے شدید نعرے بازی کی گئی اورکراچی دھرنے کے شرکا نے اسلام آباد دھرنے کے شرکا سے فون پربھی رابطہ کیا ہے۔

نمائش چورنگی پر دھرنے کے شرکا نے ایم اے جناح روڈ پر رکاوٹیں کھڑی کرکے سڑک ٹریفک کے لیے بند کردی ہے۔ جس کے باعث  مظاہرین کو منتشر کرانے کے لیے دھرنے کے اطراف مختلف تھانوں کی موبائلیں اور پولیس افسران واہلکار پہنچنا شروع ہوگئے ہیں۔ اب تک دھرنے کے اطراف 6 پولیس موبائلیں اور پولیس اہلکار پہنچ چکے ہیں۔ جب کہ دھرنے کی جگہ پر کسی بھی ناخوشگوار صورتحال سے بچنے کے لیے واٹرکینن بھی پہنچادی گئی ہے۔ تاہم دھرنے کے شرکا نے پولیس کو پر امن رہنے کی یقین دہانی کرائی ہے۔ ٹریفک پولیس نے کیپری سینما سے نمائش جانے والی ٹریفک کو سولجر بازار کی جانب موڑ دیا ہے اور گرومندر سے نمائش جانے والے ٹریفک کو نوائے وقت چوک سے پیپلزسیکریٹریٹ کی جانب بھیجا جارہا ہے۔

کراچی کے علاقے اسٹار گیٹ پربھی صورتحال نہایت کشیدہ ہوگئی ہے۔ مظاہرین نے پولیس کا گھیراؤ کرکے ایک موبائل کو یرغمال بنالیا ہے۔ پولیس نے مظاہرین کو منتشر کرنے کے لیے ہوائی فائرنگ کرنے کے ساتھ آنسو گیس کا استعمال بھی کیا ہے۔ جب کہ 5 مظاہرین کی گرفتاری بھی عمل میں آئی ہے۔ مظاہرین پولیس کی شیلنگ کے باعث مزید مشتعل ہوگئے ہیں اور احتجاجاً سڑکوں پر کھڑی گاڑیوں کے ٹائر سے ہوا نکالنی شروع کردی ہے۔ ناگن چورنگی پر بھی مظاہرین نے احتجاج کرکے گاڑیوں پر پتھراؤ کیا ہے۔

دوسری جانب شہر قائد کی کشیدہ صورتحال کے پیش نظر وزیراعلیٰ سندھ مراد علی شاہ نے میڈیا سے گفتگو کرتے ہوئے کہا ہے کہ ہر کسی کو اپنا احتجاج کرنے کی اجازت ہے۔ تاہم کسی کو بھی قانون ہاتھ میں لینے نہیں دیا جائے گا۔ انہوں نے کمشنر کراچی اورآئی جی پولیس کو معاملات ٹھیک کرنےاور شہر میں ٹریفک کلئیر کرانے کا حکم دے دیا ہےاورہدایت کی ہے کہ احتجاج کے باعث کسی بھی شہری کے لیے مشکلات پیدا نہ ہوں۔