کراچی: میرج ہال ایسوسی ایشن نے ہالز بند رکھنے کا فیصلہ واپس لے لیا

تسنیم خبررساں ادارے کی رپورٹ کے مطابق، جنرل سیکرٹری میرج ہال ایسوسی ایشن خواجہ طارق کا کہنا ہے کہ وزیر بلدیات کی پیرکو کارروائی نہ کرنے کی یقین دہانی پر ہڑتال کا فیصلہ واپس لیا، جن شادی ہالز کو لیگل کیا جاسکتا ہے انہیں بھی نہیں گرایا جائے گا، شادی ہالزکو قانونی اسٹیٹس دینے کی بھی اپیل کی ہے جبکہ غیرقانونی شادی ہالز کیخلاف کارروائی 45 دن تک مؤخرکرنے کی استدعا بھی کی گئی ہے۔

اس سے پہلے سندھ بلڈنگ کنٹرول اتھارٹی نے سپریم کورٹ کے حکم پر کارروائی کرتے ہوئے نان کمرشل پلاٹس پرقائم شادی ہالزکو نوٹسز جاری کیے تھے ، شادی ہالز کے مالکان نے فیصلے کے خلاف احتجاج کیا تھا جبکہ ایس بی سی اے سے مالکان کے مذاکرات بھی ناکام رہے تھے۔

سپریم کورٹ کے حکم پر سندھ بلڈنگ کنٹرول اتھارٹی (ایس بی سی اے) کی جانب سے نوٹسز دیئے جانے پر آل کراچی شادی ہال ایسوسی ایشن نے اتوار 27 جنوری) سے شہر کے شادی ہال بند کرنے کا اعلان کیا تھا جسے اب واپس لے لیا گیا ہے۔

اس  سے قبل معاملے پر وزیر بلدیات سندھ سعید غنی نے کہا ہے کہ پیر سے کارروائی نہیں ہوگی، سپریم کورٹ میں نظرثانی اپیل دائر کریں گے۔

انہوں نے قانونی ہالز کے مالکان کو بے فکر رہنے کی تلقین کرتے ہوئے کہا کہ ہڑتال کرنے والے بکنگ کرانے والوں کا احساس کریں۔

کراچی کے میئر وسیم اخترنے سندھ حکومت سے کہا ہے کہ شہرمیں پانچ سوعمارتیں گرانے کے حکم کے خلاف نظر ثانی اپیل کرے۔

پریس کانفرنس میں انہوں نے یہ بھی کہا کہ کے ایم سی، شادی ہال نہیں گرائے گی۔

خالد مقبول صدیقی کہتے ہیں سوال یہ ہے، اگرعمارتیں غیرقانونی ہیں تو تحقیقات کی جائیں کہ بنانے کی اجازت کس نے دی تھی؟