نوکریاں حکومت نہیں نجی سیکٹر دیتا ہے؛ 400 محکمے بند کرنے کا اعلان

خبررساں ادارے تسنیم کے مطابق اسلام آباد میں ایک تقریب سے خطاب کرتے ہوئے وفاقی وزیر برائے سائنس اور ٹیکنالوجی فواد چوہدری نے کہا کہ یہ نہیں کہ ہر شخص سرکاری نوکری ڈھونڈے، حکومت تو 400 محکمے ختم کررہی ہے مگر لوگوں کا اس بات پر زور ہے کہ حکومت نوکریاں دے۔

وفاقی وزیر نے کہا کہ یہ 70 کی دہائی کی سوچ تھی کہ نوکریوں کے لیے حکومت کی طرف دیکھا جائے، اب نجی شعبہ نوکریاں دیتا ہے۔

البتہ ان کا کہنا تھا کہ حکومت کی ذمہ داری ایسا ماحول پیدا کرنا ہے جہاں لوگوں کو روزگار میسر ہوں۔

بعدازاں ٹویٹر پر اپنے بیان کی وضاحت کرتے ہوئے فواد چوہدری کا کہنا تھا کہ ’ کہا تھا کہ نوکریاں حکومت نہیں پرائیویٹ سیکٹر دیتا ہے، حکومت نے ماحول پیدا کرنا ہے جہاں نوکریاں ہوں، یہ نہیں کہ ہر شخص سرکاری نوکری ڈھونڈے‘۔

واضح رہے کہ اپنی سائنس اور ٹیکنالوجی کی وزارت کی ذمہ داریوں سے ہٹ کر دیگر شعبوں میں زیادہ دلچسپی لینے والے چوہدری فواد سوشل میڈیا پر آئے روز کوئی ایسا بیان دے دیتے ہیں کہ جن سے قارئین ان کو آڑھے ہاتھ لے لیتے ہیں۔