جنرل سلیمانی کی شہادت؛ ایران کا عالمی عدالت سے رجوع کرنے کا اعلان

تسنیم خبررساں ادارے کی رپورٹ کے مطابق، ترجمان ایرانی عدلیہ غلام حسین اسماعیلی کا کہنا ہے کہ امریکی صدر ٹرمپ نے ایرانی شہید جنرل قاسم سلیمانی کے قتل کےاحکامات دینے کا اعتراف کیا ہے جو عدالت میں پیش کیے جانے کے لیے مضبوط ثبوت ہوسکتا ہے۔

ترجمان ایرانی عدلیہ کا کہنا ہے کہ اس میں کوئی شک نہیں کہ امریکی فوجی کا یہ ایکشن دہشتگردی کی کارروائی تھی۔

ایرانی ترجمان عدلیہ کا کہنا ہے کہ عالمی عدالت میں کیس طوالت اختیار کرسکتا ہے لیکن ایران اسے اختتام تک پہنچائےگا۔

اس سے قبل ترجمان ایرانی عدلیہ نے کہا تھا کہ یوکرین کا طیارہ غیر ارادی طور پر مار گرائے جانے کے الزام میں کچھ افراد کو گرفتار کیا جا چکا ہے۔

واضح رہے کہ 3 جنوری کو عراق میں امریکا کی جانب سے  ایرانی کمانڈر قاسم سلیمانی کو نشانہ بنایا گیا تھا جس کے نتیجے میں سمیت قاسم سلیمانی 6 افراد کی امریکی ڈرون حملے میں جام شہادت نوش کرگئے تھے ۔

 اس واقع کے بعد اسلامی جمہوریہ ایران نے امریکی فوجی اڈوں پر میزائل حملے کئے تھے۔