عمران خان کی حکومت میں قاتلوں کو گرفتاری کا کوئی خوف نہیں؛ طاہر القادری کی حکومت پر شدید تنقید

خبررساں ادارے تسنیم کے مطابق پاکستان عوامی تحریک کے سربراہ ڈاکٹر طاہر القادری نے ڈاکٹر توقیر شاہ کو سیکریٹری ہیلتھ تعینات کرنے پر وزیراعظم عمران خان کو تنقید کا نشانہ بنا دیا۔

مائیکرو بلاگنگ ویب سائٹ ٹوئٹر پر طاہر القادری نے حکومت پر طنز کرتے ہوئے کہا کہ سانحہ ماڈل ٹاون کے مرکزی کردار کو اہم عہدے پر فائز کرنے پر وزیراعظم عمران خان کو مبارکباد دینے کے لیے الفاظ نہیں ہیں۔

ان کا کہنا تھا کہ سانحہ ماڈل ٹاون کے کرداروں کو گزشتہ حکومت میں گرفتاری کا ڈر تھا لیکن اب عمران خان کی حکومت میں انہیں کوئی خوف نہیں ہے۔

طاہر القادری نے کہا کہ سانحہ ماڈل ٹاون میں قتل کیے جانے والے افراد کے اہل خانہ اب بھی انصاف کے منتظر ہیں، معصوم لوگوں کے لیے ابھی تک کچھ بھی تبدیل نہیں ہوا۔

واضح رہے کہ حکومت نے توقیر شاہ کو سیکریٹری ہیلتھ تعینات کیا ہے۔ وہ سانحہ ماڈل ٹاون کے وقت وزیر اعلیٰ پنجاب کے پرنسپل سیکریٹری تھے اور ان پر الزام تھا کہ وہ جس میٹنگ میں سانحہ ماڈل ٹاون کا فیصلہ ہوا، وہ اس میٹنگ میں موجود تھے اور وہ وزیر اعلیٰ پنجاب سے ہدایات لے کر پولیس کو پہنچا تے تھے۔

یاد رہے کہ چند ماہ قبل ستمبر 2019 میں کینیڈا سے ویڈیو لنک کے ذریعے سیاست اور سیاسی سرگرمیوں سے کنارہ کشی کا اعلان کرتے ہوئے انہوں نےکہا تھا کہ وہ اپنی خرابی صحت اور اپنی مذہبی و اصلاحی سرگرمیوں پر توجہ مرکوز کرنے کے لیے سیاست کو خیرباد کہ رہے ہیں۔

طاہر القادری نے کہا تھا کہ مجھے تصنیف وتالیف کے بے پناہ کام اور صحت کے مسائل ہیں، اس لیے پاکستان کی سیاست اور سیاسی سرگرمیوں سے ریٹائرمنٹ کا اعلان کرتا ہوں، میں اپنے تمام تر اختیارات سپریم کونسل کو دے رہا ہوں، پاکستانی سیاست میں لوٹنے کا سوال ہی پیدا نہیں ہوتا۔